اسلام آباد(آن لائن) یوٹیلیٹی سٹورز کارپوریشن کے ملازمین کی جانب سے احتجاجی دھرنے میں شرکت کیلئے سندھ اور بلوچستان سے سینکڑوں ملازمین اسلام آباد کی جانب روانہ ہوگئے ‘ اپوزیشن سیاسی جماعتوں نے کارپوریشن کے ملازمین کی جانب سے احتجاجی دھرنے کی مکمل حمایت کا اعلان کردیا ہے ۔

ڈی چوک میں کارپوریشن کے ہزاروں ملازمیں کل بروزسوموار اپنے مطالبات کے حق میں احتجاجی دھرنا دیں گے ۔ یوٹیلیٹی سٹورز کارپوریشن کی منتخب سی بی اے یونین کے چیئرمین عارف حسین شاہ کے مطابق کارپوریشن کے ملازمین کو درپیش مسائل اور حکومت کی جانب سے ادارے کی نجکاری کیلئے راہیں ہموار کرنے کے خلاف کل ڈی چوک میں احتجاجی دھرنا ہوگا جس میں شرکت کیلئے سندھ اور بلوچستان سمیت پنجاب اور خیبر پختونخوا کے دور دراز علاقوں سے ملازمین اسلام آباد پہنچنا شروع ہوگئے ہیں ۔انہوں نے کہاکہ ملازمین کی جانب سے دئیے جانے والے احتجاجی دھرنے کی اپوزیشن سیاسی جماعتوں نے بھی بھرپور حمایت کی یقین دہانی کرائی ہے ۔اس سلسلے میں پاکستان مسلم لیگ ن ،پیپلز پارٹی اور ایم ایم اے کے قائدین نے کارپوریشن کے ملازمین کی جانب سے دئیے جانے والے احتجاجی دھرنے میں شرکت پر بھی آمادگی کا اظہار کیا ہے ۔انہوں نے کہاکہ تحریک انصاف کی حکومت ایک جانب سے ملک کو مسائل سے نکالنے اور لاکھوں افراد کو نوکریاں دینے کی بات کرتی ہے جبکہ دوسری جانب سے حکومت کے مشیر اداروں کو تباہ کرکے ہزاروں افراد کو نوکریوں سے فارغ کرنے کی سازشوں میں مصروف ہیں۔ انہوں نے کہاکہ احتجاجی دھرنا ملازمین کے مطالبات کی منظوری تک جاری رہے گا۔

موضوعات:یوٹیلٹی سٹور ملازمین