بیجنگ(آئی این پی)چین اور پاکستان کے درمیان آئندہ سماجی اور اقتصادی شراکت داری میں مزید اضافہ ہوگا،کیونکہ اقتصادی راہداری منصوبوں پر بڑی تیزی سے عملدرآمد کیا جارہا ہے،ان منصوبوں پر کام کی رفتار متاثر کن ہے۔ان خیالات کااظہار شنگھائی اکیڈمی آف سوشل سائنسز کے نائب صدر ہوانگ رین ووہی نے اپنی ایک مطالعاتی رپورٹ میں کیا ہے۔جو گزشتہ روز چین کے معروف اخبار گلوبل ٹائمز نے شائع ہوئی ہے ۔

سی پیک کے بارے میں اپنی تحقیق کا ذکر کرتے ہوئے انہوں نے کہا ہے کہ وہ ان منصوبوں پر کام سے بہت متاثر ہوئے ہیں،زبردست ترقی گوادر کی بندرگاہ میں ہوئی ہے۔ جو کہ ایک خصوصی اقتصادی ژون بھی ہے۔جہاں کئی مربعہ کلو میٹر تک منصوبے کے پہلے مرحلے میں ایک صنعتی پارک بنا ہے۔ جس میں کئی کمپنیاں شامل ہونے کی خواہشمند ہیں پاکستان غیر ملکی سرمایہ کاری حاصل کرنے کے لیے ملک بھر میں نو صنعتی پارک بنانا چاہتا ہے۔نا صرف چینی کمپنیوں کو اس کی پیشکش کی گئی ہے بلکہ دنیا بھر کی کمپنیوں سے بھی کہا گیا ہے دوسرا بڑا منصوبہ چین پاکستان ہائی وے ہے۔جہاں بنیادی ڈھانچے میں بہت تیزی سے ترقی ہوئی ہے۔جو پاکستان عوام کی زندگیوں میں آرام اور خوشحالی لارہا ہے۔ابھی حالیہ برسوں کا ذکر ہے کہ چین اور پاکستان نے شاہراہ قراقرم کی تعمیر نو اور توسیع کے دوسرے مرحلے کا آغاز کیا تھا۔ہوانگ وین ہوئی کے مطابق چینی کمپنیاں پاکستان میں بنیادی ڈھانچے کی تعمیر کے لیے بہت کام کررہی ہیں انہوں نے اس پر 19ارب ڈالر خرچ کیے ہیں۔ اور 20سے زیادہ بڑے منصوبوں میں شرکت کی ہے۔چین کی تھری جورجز کارپوریشن اور چائنہ گیزو باگروپ نے پاکستان میں بجلی کی کمی کا مسئلہ حل کرنے کے لیے بجلی گھر تعمیر کیے ہیں جبکہ ہواوے ٹیکنالوجیز نے ملک کے مواسلاتی نیٹ ورکز کو جدید بنانے میں مدد دی ہے۔تھری جورجز میں چالیس ہزار اور ہواوے میں بیس ہزار سے زیادہ مقامی کارکن کام کررہے ہیں۔تاہم ہوانگ رین ووہی کا کہنا ہے کہ پاکستان اور چین کے درمیان قریبی سیاسی تعلقات کے باوجود دونوں ممالک کے عوام کا آپس میں بہت محدود رابطہ ہے۔لیکن سی پیک کے منصوبوں پر پیشرفت کے باعث ایک دوسرے کو جاننے کے بارے میں بھی یہ مسئلہ حل ہوجائیگا۔

موضوعات:پاک چین سماجی و اقتصادی شراکت