اسلام آباد (نیوز ڈیسک) ڈی پی او پاکپتن تبادلہ کیس سپریم کورٹ نے نمٹا دیا، چیف جسٹس ثاقب نثار کی سربراہی میں ڈی پی او پاکپتن تبادلہ از خود نوٹس کیس کی سماعت ہوئی تو عدالت نے وزیراعلیٰ پنجاب، احسن جمیل گجر اور آئی جی کلیم امام کے تحریری جواب مسترد کرتے ہوئے ان کو مضبوط الفاظ میں معافی مانگنے کا حکم دیا گیا۔ چیف جسٹس ثاقب نثار کے حکم پر تینوں نے نئے معافی نامے جمع کرائے، دوبارہ لکھے گئے معافی ناموں میں انہوں نے غیر مشروط معافی
مانگی جسے عدالت نے قبول کرتے ہوئے کیس نمٹا دیا۔ چیف جسٹس ثاقب نثار نے کیس نمٹاتے ہوئے ریمارکس دیے کہ گجر کسی اور جگہ بدمعاش ہوں گے یہ پاکستان ہے اور یہاں گجر کی بدمعاشی نہیں چلے گی، کسی کو اکڑ کی اجازت نہیں دیں گے، چیف جسٹس نے مزید کہا کہ آئندہ سیاسی مداخلت نہ ہو آئندہ ایسا ہوا تو یہ کیس دوبارہ کھول دیں گے۔ چیف جسٹس ثاقب نثار نے اپنے ریمارکس میں مزید کہا کہ میں دو اڑھائی ماہ ہوں اس وقت تک آپ کو محتاط رہنا ہوگا۔
