اسلام آباد (مانیٹرنگ ڈیسک) پی ٹی آئی رہنما جہانگیر ترین کی بہن سیمی ایزدی کی جانب سے پی ٹی آئی کے خلاف پارٹی فنڈنگ کیس کے فریق اکبر ایس بابر کی بہن کو ہراساں کیے جانے کا انکشاف،ویڈیو بھی منظر عام پر آگئی۔یہ ویڈیو اکبر ایس بابر کی جانب سے سوشل میڈیا پر پوسٹ کی گئی ہے جس میں انہیں جہانگیر ترین کی بہن سیمی ایزدی جو اسلام آباد کے علاقہ ایف 10 کی میئر ہیں۔
انہیں پی ٹی آئی کی رکن اسمبلی نفیسہ خٹک کے ساتھ بحث کرتے ہوئے دیکھا جاسکتا ہے۔ اکبر ایس بابر کی جانب سے الزام عائد کیا گیا ہے کہ ان کی بہن جو کہ ایف 10 میں اپنے بیمار شوہر کے ساتھ رہتی ہیں انہیں جہانگیر ترین کی بہن ، ایم این اے نفیسہ خٹک اور سی ڈی اے کی جانب سے ہراساں کیا جارہا ہے۔اکبر ایس بابر نے بتایا کہ 27 ستمبر کو سی ڈی اے اہلکار ان کی بہن کے گھر آئے اور گھر کے باہر موجود فٹ پاتھ کی توڑ پھوڑ شروع کردی ۔ جب میں وہاں پہنچا تو اہلکاروں کے پاس کوئی تحریری حکم نامہ موجودنہیں تھا ، پوچھنے پر اہلکاروں نے بتایا کہ انہیں اعلیٰ حکام نے ایسا کرنے کا کہا ہے۔اکبر ایس بابر نے کہا کہ سی ڈی اے اہلکار دوسری بار کل میری بہن کے گھر آئے اور وہی عمل دہرایا جبکہ سیمی ایزدی اور نفیسہ خٹک پولیس پارٹی لے کر آئیں۔ جب میں وہاں پہنچا تو دونوں خواتین میری بہن کے ساتھ بحث کر رہی تھیں ۔ویڈیو میں بھی اکبر ایس بابر ، نفیسہ خٹک اور سیمی ایزدی کا بحث مباحثہ دیکھا جاسکتا ہے۔اکبر ایس بابر نے جب پوچھا کہ دونوں خواتین کس قانون کے تحت ان کی بہن کے گھر آئی ہیں تو نفیسہ خٹک نے کہا کہ وہ انسانی حقوق کی کارکن ہیں اور انہیں کسی کی مدد کرنے کیلئے قانونی حکم نامے کی ضرورت نہیں ہے۔ سیمی ایزدی نے کہا کہ انہیں ایک بزرگ خاتون کی جانب سے ایک شکایت موصول ہوئی تھی اس لیے وہ اس شکایت کا جائزہ لینے آئی ہیں۔
