اسلام آباد(مانیٹرنگ ڈیسک)خوشحال ایکسپریس پھر حادثے کا شکار ،سہیون کے علاقے سن کے قریب کراچی سے پشاور جانے والی خوشحال خان خٹک ایکسپریس کی 10 بوگیاں پٹری سے اتر گئیں جس کے باعث اپ اور ڈاؤن لنک بند ہے۔یاد رہے کہ گزشتہ 10 روز کے دوران خوشحال خان خٹک ایکسپریس دوسری مرتبہ حادثے کا شکار ہوئی ہے،ریلوے حکام کا کہنا ہے کہ خوشحال خان خٹک ایکسپریس کو پیش آئے حادثے سے کراچی سے لاہور جانے والے ٹریک کو نقصان نہیں پہنچا ۔
سیہون ٹرین حادثے کا ریلوے کے کراچی لاہور سیکشن پر اثر نہیں پڑےگا۔سینئر جنرل منیجر ریلوے آفتاب اکبر کے مطابق خوشحال خان خٹک ایکسپریس کی 13 میں سے 10 بوگیاں پٹری سے اتریں جس کے بعد 3 ریلیف ٹرینیں حادثے کی جگہ بھجوا دی گئی ہیں۔حادثے میں کوئی جانی نقصان نہیں ہوا تاہم تحقیقات کا حکم دے دیا گیا ہے ۔ٹریک بحال نہ ہونے کے 5 گھنٹے بعد متاثرہ ٹرین کے مسافر انڈس ہائی وے سے گاڑیوں کے ذریعے اپنی منزلوں کی جانب روانہ ہوگئے ہیں۔
