اسلام آباد(مانیٹرنگ ڈیسک)حکومت کو ہزیمت کا سامنا ،ریڈیو پاکستان کے ملازمین نے ریڈیو پاکستان کی عمارت لیز پر دینے کا فیصلہ واپس لینے پر مجبور کر دیا۔ تفصیلات کے مطابق تحریک انصاف کی حکومت نے اقتدار میں آنے کے بعد پرشکوہ اور بڑی سرکاری عمارات کو ذرائع آمدن میں اضافے کیلئے استعمال میں لانے کا اعلان کیا تھا جس کے بعد وفاقی وزیر اطلاعات نے ریڈیو پاکستان
کے دورے کے موقع پر ریڈیو پاکستان کی عمارت کو لیز پر دینے کا اعلان کیا تھا۔ وفاقی وزیر اطلاعات کے اس اعلان کے بعد ریڈیو پاکستان کے ملازمین میں بے چینی پائی جاتی تھی جس پر ریڈیو ورکرز کے نمائندہ وفد نے اس حوالے سے وفاقی وزیر اطلاعات فواد چوہدری سے ملاقات کر کے اپنے مسائل اور تحفظات سے آگاہ کیا تھا جس پر حکومت کی جانب سے فوری طور پر کوئی بھی قدم نہ اٹھایا گیا اور تسلی تشفی سے کام لیا گیا جس پر ریڈیو پاکستان کے ملازمین سڑکوں پر آگئے اور احتجاج شروع کر دیا جبکہ آج ریڈیو پاکستان کے ملازمین نے پارلیمنٹ کے سامنے پہنچ کر مارچ کر نے کا اعلان کر رکھا تھا جس پر پولیس کی بھاری نفری انہیں روکنے کیلئے تعینات کی گئی تھی ۔ ریڈیو پاکستان کے ملازمین کا پارلیمنٹ ہائوس کے سامنے تک مارچ شروع ہوا تو پولیس نے انہیں روکنے کی کوشش کی جس پر ریڈیو ملازمین اور پولیس اہلکار آپس میں گتھم گتھا بھی ہوئے تاہم ریڈیو پاکستان کے ملازمین کی بڑی تعداد پارلیمنٹ ہائوس کے سامنے پہنچنے میں کامیاب ہو گئی اور انہوں نے ریڈیو پاکستان کی عمارت لیز پر دینے کے حکومتی فیصلے کے خلاف احتجاج شروع کرتے ہوئے فیصلہ واپس لینے کا مطالبہ شروع کر دیا ۔ ریڈیو پاکستان کے ملازمین کا کہنا تھا کہ ریڈیو پاکستان کی عمارت ادارے کی پہچان ہے اور حکومت ریڈیو پاکستان کی خدمات کو نظر انداز کر رہی ہے۔ ریڈیو پاکستان کے
ملازمین کے پارلیمنٹ ہائوس کے سامنے احتجاج پر پر حکومت نے بلاآخر گھٹنے ٹیکتے ہوئے ریڈیو پاکستان کی عمارت کو لیز پر دینے کا فیصلہ واپس لینے کا اعلان کر دیا ہے۔ پارلیمنٹ ہائوس کے سامنے احتجاج کرتے ملازمین سے خطاب کرتے ہوئے وزیر مملکت برائے پارلیمانی امور علی محمد خان نے اعلان کرتے ہوئے کہا کہ حکومت نے ریڈیو پاکستان کی عمارت کی لیز پر دینے کا فیصلہ واپس لے لیا ہے اور وفاقی وزیر اطلاعات فواد چوہدری نے ریڈیو پاکستان کے ملازمین کی فلاح و بہبود کیلئے تجاویز دینے کی درخواست کی ہے۔
