اسلام آباد(مانیٹرنگ ڈیسک)وزیراعظم عمران خان کا اپنے بھارتی ہم منصب نریندر مودی کو خط ،مذاکرات کا سلسلہ بحال کرنے پر زور۔بھارتی اخبار کے مطابق عمران خان نے بھارتی وزیر اعظم کو لکھے گئے خط میں کہا کہ پاکستان اور بھارت کشمیر سمیت تمام تصفیہ طلب مسائل حل کریں۔عمران خان نے وزیر خارجہ شاہ محمود قریشی کی بھارتی ہم منصب سشما سوراج سے ملاقات پر بھی زور دیا ۔
شاہ محمود قریشی اور سشما سوراج اس ماہ اقوام متحدہ کے جنرل اسمبلی اجلاس میں شرکت کریں گے۔عمران خان نے خط بھارتی وزیر اعظم کی جانب سے بامعنی مذاکرات پر زور دیے جانے کے بعد بھیجا ہے ، بھارتی وزیراعظم نے بامعنی مذاکرات کی بات عمران خان کی وکٹری تقریرکے جواب میں کہی تھی۔یاد رہے کہ عمران خان نے کہا تھا تعلقات معمول پر لانے میں بھارت ایک قدم آگے بڑھا تو پاکستان دو قدم بڑھے گا۔
