لاہور (آن لائن) سابق خاتون اول بیگم کلثوم نواز کی آخری رسومات میں شامل ہونے کے لیے سابق وزیراعظم نواز شریف ، ان کی صاحبزادی مریم نواز اور ان کے داماد کیپٹن (ر) صفدر کو پیرول پر رہائی دی گئی تھی جس میں پیر 17 ستمبر تک کی توسیع کر دی گئی ۔ذرائع محکمہ داخلہ کے مطابق سابق وزیراعظم ، ان کی صاحبزادی اور داماد کی پیرول پر رہائی کی مدت 17ستمبرسوموار کی سہ پہر کو ختم ہو جائیگی۔

، جس کے بعد تینوں کو از سر نو اڈیالہ جیل منتقل کر دیا جائے گا۔جاتی امرا میں قانون نافذ کرنے والے اداروں کی ایک ٹیم نواز شریف،، مریم اور صفدر کی حفاظت اور نگرانی کے لیے موجود ہے۔ قواعد کے مطابق اسی ٹیم کی نگرانی میں تینوں کو دوبارہ اڈیالہ جیل منتقل کیا جائے گا۔سابق وزیراعظم نواز شریف اور ان کی صاحبزادی مریم نواز کی دوبارہ اڈیالہ جیل منتقلی کے پیش نظر مسلم لیگ (ن )کے آئندہ سیاسی فیصلے جیل سے ہی کرنے کا فیصلہ کیا گیا ہے۔ ذرائع کے مطابق اڈیالہ جیل منتقل ہونے کے بعد سابق وزیراعظم نواز شریف اور ان کی صاحبزادی مریم نواز ہی پارٹی کے آئندہ فیصلے کریں گے اور اس حوالے سے سینئیر قیادت اور رہنماؤں کو تیار رہنے کی تلقین کی گئی ہے کیونکہ نواز شریف اور مریم نواز کے دوبارہ اڈیالہ جیل منتقل ہونے کے بعد مسلم لیگ ن جارحانہ سیاست کرنے کا فیصلہ رکھتی ہے۔ اس حوالے سے نواز شریف نے بھی دو ٹوک پالیسی کا اعلان کر دیا ہے اورواضح ہدایات جاری کر دی ہیں کہ اب کسی قسم کی مفاہمی پالیسی یا حکمت عملی نہیں اپنائی جائیگی۔