لاہور( این این آئی)سابق وزیر اعظم محمد نواز شریف کی صاحبزادی مریم نواز نے کہا ہے کہ این اے 120مسلم لیگ (ن) کا قلعہ ہے ،عوام کی حمایت سے بھاری اکثریت سے کامیابی حاصل کریں گے ،انتخابی مہم میں عوام کی طرف سے بھرپو ر پذیرائی مل رہی ہے، مسلم لیگ (ن) کی حکومت عوام کو مایوس نہیں کرے گی ۔

ا ن خیالات کا اظہار انہوں نے ماڈل ٹاؤن اور جاتی امراء رائے ونڈ میں این اے 120کے ضمنی انتخاب کے حوالے سے اجلاسوں کی صدارت کرتے ہوئے کیا ۔ اس موقع پر سینیٹر پرویزرشید ، خواجہ سعد رفیق، سینیٹر آصف کرمانی ،(ن) لیگ لاہور کے پرویز ملک، خواجہ احمد حسان ،شائستہ پرویز ملک،بلال یاسین ،ماجد ظہور، ڈاکٹر اسد اشرف،سید توصیف شاہ ، چوہدری شہباز سمیت دیگر بھی موجود تھے۔ اجلاسوں میں اب تک کی انتخابی مہم کا جائزہ اور آنے والے دنوں میں اس میں مزید تیزی لانے کا فیصلہ کیا گیا ۔ بتایا گیا ہے کہ مریم نواز آج بھی متحرک کارکنوں اور بلدیاتی نمائندوں سے ملاقاتیں کرکے انہیں انتخابی سرگرمیوں سے متعلق ہدایات دیں گی جبکہ آج منگل کو مزنگ میں مرکزی دفتر کا افتتاح بھی کریں گی ۔مریم نواز شریف کا کہنا تھاکہ این اے 120(ن)لیگ کا گڑھ ہے اور ضمنی انتخاب میں عوام کی حمایت سے بھاری اکثریت سے کامیابی حاصل کریں گے۔ انہوں نے کہا کہ عوام کی طرف سے بھرپو رپذیرائی مل رہی ہے ۔ مسلم لیگ (ن) کی حکومت عوام کو مایوس نہیں کرے گی ۔ ترقی کا سفر جاری رکھیں گے اور اس راہ میں آنے والی رکاوٹوں کا ڈٹ کر مقابلہ کیا جائے گا۔