اسلام آباد (مانیٹرنگ ڈیسک) امریکی نائب وزیر خارجہ ایلس ویلز جو امریکی کی جنوبی ایشیا پالیسی کے بعد پاکستانی ردعمل کی وجہ سے پاکستان 28 اگست کو آ رہی تھی، ان کا دورہ ملتوی کر دیا گیا ہے، تفصیلات کے مطابق امریکی سفارتخانے کے ترجمان نے بتایا کہ نائب وزیر خارجہ ایلس ویلز کا دورہ پاکستان حکومت کی درخواست پر ملتوی کیا گیا ہے۔ ترجمان نے کہا کہ دورہ دونوں ممالک کے لیے مناسب وقت تک ملتوی کیا گیا ہے، ایسا پاکستانی اعلیٰ حکام کی مصروفیات کی وجہ سے ہوا ہے۔

ذرائع کا کہنا ہے کہ امریکی نائب وزیر خارجہ نے حالیہ کشیدہ صورت حال میں پاکستان کے اعلیٰ حکام سے ملاقاتیں کرنا تھیں مگر پاکستانی حکام کی طرف سے وقت نہ ملنے کی وجہ سے امریکہ کی نائب وزیر خارجہ نے اپنا دورہ ملتوی کر دیا ہے۔ امریکہ کے صدر ٹرمپ کے پاکستان افغانستان پالیسی بیان کے دوران پاکستان پر بے بنیاد الزامات کے باعث پیدا ہونے والی صورت حال پر امریکی نائب وزیر خارجہ نے پاکستانی اعلیٰ حکا م سے ملاقات کی درخواست کی تھی۔ واضح رہے کہ پاکستان نے الزامات کے جواب میں امریکی سفارت کار کو امریکی نائب وزیر خارجہ ایلس ویلز سے ملاقات کا وقت دینے سے انکار کردیا ہے۔ دریں اثناء امریکی صدر ڈونلڈ ٹرمپ کے پاکستان پر بے بنیاد الزامات کے بعد پاکستان نے سخت ردعمل دیا، اسی ردعمل کے نتیجے میں امریکہ کی نائب وزیر خارجہ ایلس ویلز پاکستان کے ہنگامی دورے پر آ رہی ہیں۔ وہ کل پاکستان کی اعلیٰ سول اور فوجی قیادت سے حالیہ صورتحال پر بات چیت کریں گی۔ صدر ڈونلڈ ٹرمپ کے پاکستان کے حوالے سے بیان پر شدید ردعمل پر امریکی حکام پریشان ہو گئے ہیں، دو ہفتوں کے دوران امریکی نائب وزیر خارجہ ایلس ویلز پاکستان کے دوسرے دورے پر جلد اسلام آباد آئیں گی۔ نائب وزیر خارجہ ایلس ویلز کے دورے کی تصدیق کرتے ہوئے محکمہ خارجہ نے کہا کہ نائب وزیر خارجہ پاکستان کی اعلیٰ سول اور فوجی قیادت سے ملاقاتوں میں جنوبی ایشیا بارے امریکی پالیسی بارے اعتماد میں لیں گی۔ امریکی محکمہ خارجہ نے نائب وزیر خارجہ ایلس ویلز کے دورے کو اہمیت کا حامل قرار دیا ہے، امریکی کی نائب وزیر خارجہ ایلس ویلز کل پاکستان پہنچ رہی ہیں یہ ان کا دو ہفتوں میں دوسرا دورہ ہے۔