سرگودھا(آن لائن)سرگودھا کے علاقے بھاگٹا نوالا کے قریب پاک فضائیہ طیارہ ایف 7 پی جی ایئرکرافٹ کھیتوں میں گر کر تباہ ہو گیا ، طیارے میں موجود دونوں پائلٹس نے چھلانگ لگا کر جان بچائی ، دونوں پائلٹ زخمی ہو گئے ۔ترجمان پی اے ایف کے مطابق پاک فضائیہ کا ایف سیون پی جی ایئرکرافٹ طیارہ سرگودھا کے علاقے بھاگٹانوالا کے قریب کھیتوں میں گر کر اس وقت تباہ ہوگیا جب اس میں فنی خرابی پیدا ہو گئی۔ترجمان پاک فضائیہ کے مطابق طیارہ معمول کی آپریشنل پرواز پر تھا

۔میڈیا رپورٹس کے مطابق پائلٹ نے اپنے ٹاور سے رابطہ کرکے آخری پیغام میں بتایا کہ طیارے میں کوئی فنی خرابی پیدا ہو گئی ہے جس کے باعث وہ اپنی جان بچانا چاہتے ہیں جس پر انہیں باقاعدہ اجازت دی گئی اور پائلٹ نے طیارے کا رخ کھیتوں کی جانب کردیا،طیارے میں موجود دونوں پائلٹ نے چھلانگ لگا کر اپنی جانیں بچائیں۔حادثے کی اطلاع ملتے ہی پاک فضائیہ کی ٹیم اور امدادی کارکن جائے حادثے پر پہنچ گئے۔ریسکیو ذرائع کاکہنا ہے کہ ایک پائلٹ کی ٹانگ اور دوسرے کا بازو ٹوٹ گیا ہے جنہیں زخمی حالت میں سرگودھا ہسپتال منتقل کردیا گیا ہے ۔تاہم حادثے میں کسی قسم کا کوئی جانی نقصان نہیں ہوا۔