لاہور( این این آئی)سابق وزیر اعظم راجہ پرویز اشرف نے کہا ہے کہ نیب میں ہمارے خلاف تو فوری کیسز بنائے اور نام ای سی ایل میں ڈالے جاتے ہیں لیکن نواز شریف کے معاملے میں ایسا نہیں کیا گیا ،پیپلزپارٹی عدالتوں کا احترام کرتی ہے اور اس کا ثبوت میرا ہر پیشی پر خود پیش ہونا ہے ۔

ان خیالات کا اظہار انہوں نے پیپکو میں غیر قانونی بھرتیوں کے کیس میں نیب عدالت میں پیشی کے موقع پر گفتگو کرتے ہوئے کیا ۔ راجہ پرویز اشرف نے کہا کہ جب بھی عدالتوں کی طرف سے بلایا گیا ہم بغیر کسی تاخیر ی حربے کے پیش ہوئے ہیں ۔حیرت ہے کہ نیب میں ہمارے خلاف تو فوری کیس بنا دئیے جاتے ہیں بلکہ نام بھی ای سی ایل میں ڈالے جاتے ہیں لیکن نواز شریف کے بارے میں اتنا بڑا فیصلہ آیا لیکن نیب حرکت میں نہیں آیا ۔ اس معاملے میں سپریم کورٹ نے جے آئی ٹی بنائی اور کنکریٹ ثبوت سامنے آئے ہیں لیکن ابھی تک نواز شریف کا نام ای سی ایل میں نہیں ڈالا گیا ۔ انہوں نے کہا کہ یوسف رضا گیلانی اور میں سابق وزیر اعظم رہ چکے ہیں لیکن ہمیں ای سی ایل میں ڈالا گیا جبکہ نواز شریف بھی سابق وزیراعظم ہیں لیکن ان کے ساتھ رویہ مختلف ہے ،یہ دوہرا معیار کیوں ہے ؟۔ قانون کی تشریح ایک ہی جیسے ہونی چاہیے اور سب کے ساتھ برابری کا سلوک کیا جانا چاہیے۔ قبل ازیں راجہ پرویز اشرف اپنے وکلاء کے ہمراہ نیب عدالت میں پیش ہوئے ۔ آئندہ سماعت 19ستمبر تک ملتوی کر دی گئی جس میں فرد جرم عائد کرنے کی کارروائی شروع ہو گی ۔