راولپنڈی (آئی این پی) آرمی چیف جنرل قمر جاوید باجوہ نے کہا ہے کہ ہم امن اورقانون کی حکمرانی بحال کریں گے، میجرعلی سلمان کی شہادت ہمارے لیے باعث فخرہے،قوم متحد ہے اپنے شہید کو عزت اور مقام دیتی ہے ،کوئی خطرہ قوم کے عزم کو متزلزل نہیں کرسکتا۔جمعہ کو پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل قمر جاوید باجوہ اوران کی اہلیہ نے لاہور میں میجرعلی شہیدکے گھرکا دورہ کیا جہاں انھوں نے شہید کے اہل خانہ سے ملاقات کی ۔

آرمی چیف نے شہیدمیجرعلی سلمان کی عظیم قربانی پرخراج عقیدت پیش کیا۔انھوں نے کہاکہ میجرعلی سلمان کی شہادت ہمارے لیے باعث فخرہے ،کوئی خطرہ قوم کے عزم کو متزلزل نہیں کرسکتا۔میجرعلی سلمان نے 9اگست کو تیمرگرہ دیر میں خفیہ اطلاعات کی بنیاد پر کیے گئے آپریشن کے دوران جام شہادت نوش کیا تھا۔ بعد ازاں آرمی چیف جنرل قمر جاوید باجوہ بریگیڈئر محمد حسنین جو جنوبی وزیرستان میں سڑک حادثے میں شہید ہوگئے تھے کے گھر بھی گئے اور اہلخانہ سے تعزیت کی۔کور کمانڈر لاہوربھی آرمی چیف کے ہمراہ تھے ۔