اسلام آباد (مانیٹرنگ ڈیسک) گاڑی کی ٹکر سے جاں بحق ہونیوالے بچے کے ماں باپ کے ساتھ کیا ہوا؟ تفصیلات کے مطابق سابق وزیراعظم نواز شریف کی ریلی میں جاں بحق ہونے والے بچے حامد کے والد کی حالت تشویش ناک، دل کا دورہ پڑنے پر ہسپتال منتقل کردیا گیا، واضح رہے کہ بچے کے والدین مسلسل انصاف کا تقاضا کر رہے ہیں، اس دوران بچے کے والد کو دل کا دورہ پڑ گیا اور ان کی حالت انتہائی تشویشناک ہے، حالت زیادہ خراب ہونے پر انہیں ہسپتال منتقل کر دیا گیا ہے،
دریں اثناء سابق وزیراعظم نواز شریف کا قافلہ جو کہ پنجاب ہاؤس اسلام آباد سے لاہور کے لیے روانہ ہوا تھا، وہ اب گوجرانوالہ میں پڑاؤ کر چکا ہے، اس قافلے میں شامل گاڑیوں نے دو افراد کو ٹکر مار دی، جس کے باعث ان دو افراد کو تشویشناک حالت میں ہسپتال منتقل کر دیا گیا ہے، اس سے پہلے یہ قافلہ ایک بچے اور ایک 55 سالہ شخص کی زندگی چھین چکا ہے۔ دریں اثناء بارہ سالہ سالہ حامد کی ہلاکت کے بعد ریلی میں شریک ایک موٹر سائیکل نے ایک 55 سالہ شخص کو ٹکر مار دی، 55 سالہ شخص جس کا تعلق چک پیرانہ گجرات سے ہے موٹر سائیکل کی ٹکر سے ہلاک ہو گیا ہے، اس طرح نواز شریف کے قافلے نے ایک دوسرے شخص کی جان بھی لے لی، دریں اثناء نواز شریف کے قافلے میں شامل ایلیٹ فورس کی گاڑی نے حامد کی جان لے لی ہے، حامد کا تعلق لالہ موسیٰ کے علاقے رحمت آباد سے بتایا جاتا ہے اور اس کی عمر 14سے 16سال کے درمیان بتائی جاتی ہے۔ کچھ ٹی وی چینل اس کی عمر بارہ سال بتا رہے ہیں، عینی شاہدین کے مطابق حامد نواز شریف کے استقبال کیلئے کھڑا تھا جیسے ہی قافلہ سڑک پر نمودار ہوا حامد اسے دیکھنے کیلئے آگے آیا اور اسی اثنا میں ایلیٹ فورس کی گاڑی کی زد میں حامد آگیا، گاڑی کے اگلے ٹائر کے نیچے اس کی ٹانگیں آنے کے باعث وہ سڑک پر گر گیا جبکہ گاڑی کا پچھلا ٹائر اس کے سر کے اوپر سے گزر گیا
جس کی وجہ سے وہ جان کی بازی ہار گیا۔ عینی شاہدین کے مطابق وہاں موجود لوگ ایلیٹ فورس گاڑی کے اہلکار کو چیخ چیخ کر کہتے رہے کہ بندہ نیچے آگیا ہے مگر اس نے ان کی نہ سنی اور گاڑی کو تیز رفتاری سے حامد کے سر کے اوپر سے گزار کر لے گیا۔ حامد خون میں لت پت سڑک پر پڑا رہا لوگ اسے اپنی مدد آپ کے تحت اٹھا کر طبی امداد کے لیے لے گئے لیکن وہ جانبر نہ ہو سکا۔
