اسلام آباد (آئی این پی) ملک میں مستقبل میں چیف ایگزیکٹو کے ممکنہ خلاء کو پر کرنے کیلئے پاکستان مسلم لیگ (ن) نے آئین و قوانین میں ترامیم پر مشاورت شروع کر دی، ترامیم کے تحت کسی بھی وقت چیف ایگزیکٹو کی سبکدوشی، نا اہلی، برطرفی یا کسی اور وجہ سے خلاء آنے کی صورت میں متبادل انتظام تجویز کیا جائے گا۔ ذرائع کے مطابق پاکستان مسلم لیگ (ن) نے مستقبل میں کسی بھی وجہ سے چیف ایگزیکٹو کے نہ ہونے پر پیدا ہونے والے خلاء کے تدارک کیلئے آئین اور قوانین میں ترامیم

پر غور شروع کر دیا ہے، ابتدائی طور پر اس بارے میں مشاورت بھی کی گئی ہے، حتمی فیصلہ وزیراعظم اور وفاقی کابینہ کے فعال ہونے پر کیا جائے گا اور تجویز کو ٹھوس شکل ملنے پر دیگر سیاسی جماعتوں سے اس بارے میں رابطے کئے جائیں گے، آئین و قوانین میں ترامیم کے ذریعے کسی بھی وجہ سے چیف ایگزیکٹو کے ہٹائے جانے کی صورت میں ملکی انتظام و انصرام چلانے کا متبادل نظام وضع کر دیا جائے گا،جس کے تحت ملکی انتظامی سربراہ کے حوالے سے خلاء پیدا نہیں ہو سکے گا۔

موضوعات:نئی آئینی ترمیم