اسلام آباد (آئی این پی)پاکستان میں اقوام متحدہ کے ریزیڈنٹ کوآرڈینیٹر نیل بونے نے عبدالولی خان یونیورسٹی میں طالب علم مشعال خان کے قتل پر انتہائی افسوس کا اظہار کرتے ہوئے کہا کہ اقوام متحدہ کو اس بات پر افسوس ہے کہ مشعال کا قتل ایک تعلیمی ادارے میں ہوا اور قاتل ان کے ساتھی طالب علم ہیں۔ہفتہ کو اقوم متحدہ کے نمائندے نے کہا کہ پاکستان کو مشعال کے قاتلوں کو قانون کیمطابق سزا دینی چاہیے۔
نیل بونے کا مشعال کے لواحقین سے اظہار ہمدردی کرتے ہوئے کہنا تھا کہ مشعال خان کے قاتل کروڑوں طلبا کے لیے بدنامی کا باعث ہیں اور ان کے قاتلوں کو کیفرکردار تک پہنچانا چاہیے۔ان کا کہنا تھا کہ پاکستان، اقوام متحدہ کے دنیا بھر میں ہونے والے مختلف معاہدوں کا رکن ہے اس لیے اس طرح کے حادثات کو دوبارہ پیش آنے سے روکنے کے لیے اقدامات کیے جائیں۔خیال رہے کہ دوروز قبل مردان کی عبدالولی خان یونیورسٹی میں شعبہ ابلاغ عامہ کے طالب علم مشعال خان کو یونیورسٹی کے طلبا نے توہین رسالت کے الزام میں تشدد کا نشانہ بنایا تھا جبکہ فائرنگ کے نتیجے میں ان کی ہلاکت ہوئی تھی۔خیبرپختونخوا حکومت نے واقعے کی عدالتی انکوائری کی منظوری دیتے ہوئے سمری پشاورہائی کورٹ کو بھیج دی ہے جہاں ہائی کورٹ کے چیف جسٹس عدالتی انکوائری کے لیے کمیٹی قائم کردیں گے۔وزیر اعلی خیبرپختونخو پرویز خٹک نے اپنے بیان میں کہا تھا کہ ابتدائی معلومات کے مطابق مشعال کی جانب سے توہین رسالت کے حوالے سے کوئی ثبوت نہیں ملا ہے۔دوسری جانب سے ایف آئی آر میں نامزد آٹھ ملزمان کو مردان کی انسداد دہشت گردی عدالت میں پیش کردیا گیا جبکہ دیگر ملزمان کی گرفتاری کے لیے چھاپے مارے جارہے ہیں۔
