اسلام آباد (این این آئی) پارٹی نشان الاٹ نہ کرنے کے معاملے پر تحریک انصاف نے الیکشن کمیشن کے فیصلے کے خلاف ہائی کورٹ جانے کافیصلہ کر لیا۔ذرائع کے مطابق چیئرمین پی ٹی آئی عمران خان نے پارٹی نشان بلے کی بحالی کیلئے قانونی ماہرین کو پٹیشن تیارکرنے کی ہدایت کر دی۔

پٹیشن میں تحریک انصاف الیکشن کمیشن حکم کو غیر قانونی اورغیرآئینی قرار دے گی اور الیکشن کمیشن کا حکم واپس لینے کے لیے استدعا بھی کی جائے گی۔واضح رہے کہ الیکشن کمیشن نے پارٹی انتخابات کی رپورٹ جمع نہ کرانے پر تحریک انصاف کو آئندہ کسی بھی ضمنی انتخابات یا عام انتخابات میں انتخابی نشان الاٹ نہ کرنے کا فیصلہ کیا تھا۔واضح رہے کہ تحریک انصاف کو انٹرا پارٹی الیکشن میں تاخیر مہنگی پڑگئی جس کی پاداش میں الیکشن کمیشن نے پارٹی پردو ماہ کیلئے ضمنی الیکشن لڑنے پر پابندی لگا دی ہے ۔ اب پابندی کے باعث تحریک انصاف پی پی 23 چکوال سمیت 4 صوبائی حلقوں میں ضمنی انتخاب نہیں لڑ سکے گی۔ الیکشن کمیشن نے تحریک انصاف کوچار ضمنی انتخابات سے باہر کر دیا۔ پی پی 23 چکوال میں کپتان کا کھلاڑی بلے کے بغیر میچ کھیلے گا۔

الیکشن کمیشن ذرائع کے مطابق پی ٹی آئی کو اپریل اور مئی میں ہونے والے ضمنی انتخابات میں حصہ لینے کی اجازت نہیں ہوگی۔ پی پی 23 چکوال میں 18 اپریل کو ضمنی الیکشن کیلئے عمران خان نے اتوار کو جلسہ کیا تھا مگر ان کے امیدوار کو پارٹی کا انتخابی نشان الاٹ نہیں کیا گیا۔ سندھ اسمبلی کے حلقے پی ایس 81 سانگھڑ میں 20 اپریل کو ، خیبرپختونخوا میں پی کے 54 مانسہرہ اور پی کے 82 کوہستان میں 10 مئی کو ضمنی انتخابات ہوں گے۔ وہاں بھی کپتان کے کھلاڑی بلے کے بغیر میدان میں اتریں گے۔