لندن (مانیٹرنگ ڈیسک ) متحدہ قومی موومنٹ کے قائد الطاف حسین نے پارٹی کی تنظیم سازی، فیصلہ سازی اور پالیسی سازی کے مکمل اختیارات رابطہ کمیٹی کے سپرد کردیئے۔ ایم کیو ایم ترجمان واسع جلیل نے سماجی رابطے کی ویب سائیٹ پر پیغام شیئر کیا جس میں الطاف حسین نے ایم کیو ایم کے تمام منتخب نمائندوں، ذمہ داروں، کارکنوں اور ہمدردوں سے اپیل کی کہ وہ تحریک کی بہتری کے لیے رابطہ کمیٹی کے ہاتھ مضبوط کریں۔ الطاف حسین نے کہا کہ ایم کیو ایم کے سینئر رہنما ڈاکٹر فاروق ستار اور دیگر رہنماؤں نے اپنی پریس کانفرنس میں جن خیالات کا اظہار کیا، وہ ان کا احترام کرتے ہیں۔ساتھ ہی ان کا کہنا تھا،’میں اب رابطہ کمیٹی کے مشورے کے مطابق اپنی صحت کی بہتری پر خصوصی توجہ دوں گا کیونکہ پے در پے حادثات، افسوس ناک خبروں اور مسلسل دن رات تنظیمی مصروفیات کی وجہ سے میں شدید ذہنی تناؤ کا شکار تھا اور اپنی صحت پر توجہ نہیں دے پارہا تھا۔ الطاف حسین نے رابطہ کمیٹی سے اپیل کی کہ وہ لاپتہ کارکنوں کی بازیابی، ان کے پریشان حال اہلخانہ کی دیکھ بھال اور اسیر ساتھیوں کے مقدمات کی پیروی پر خصوصی توجہ دیں۔ واضح رہے کہ 22 اگست کو پریس کلب پر بھوک ہڑتال پر بیٹھے کارکنوں سے خطاب میں الطاف حسین نے پاکستان مخالف نعرے لگوائے تھے جس کے بعد کارکنوں نے مشتعل ہوکر نجی ٹی چینل پر دھاوا بول دیا اور وہاں توڑ پھوڑ کی۔ اس دوران فائرنگ کے نتیجے میں ایک شخص جان حق ہوگیا تھا۔