سری نگر(آن لائن) کل جماعتی حریت کانفرنس کے ترجمان عبدالحمید لون نے کہا ہے کہ مقبوضہ کشمیر میں بھارتی مظالم کے حوالے سے آرمی چیف جنرل راحیل شریف کے بیان کا خیر مقدم کرتے ہوئے کہا ہے کہ اس سے کشمیریوں کو حوصلہ ملا ہے، وزیراعظم نواز شریف سے اپیل ہے عالمی سطح پر مسئلہ کشمیر کو آجاگر کر یں۔ایک نجی ٹی وی سے گفتگو کرتے ہوئے ترجمان حریت کانفرنس نے آرمی چیف کے بیان پر ردعمل ظاہر کرتے ہوئے کہا کہ پاکستان دنیا میں کشمیر یوں کا کیس لڑ رہا ہے، اقوام متحدہ سمیت پوری دنیا دوغلی پالیسی پر چل رہی ہے، بھارت کشمیریوں پر مظالم ڈھا رہا ہے، تمام انسانی حقوق کی علمبردار تنظیمیں بھارتی مظالم پر خاموش ہیں صرف پاکستان ہے جو ہمارے ساتھ کھڑ اہے ۔آرمی چیف جنرل راحیل شریف کے بیان پر ہم مطمئن ہے، ان کے بیان سے ہمیں حوصلہ ملا کہ ہم تنہا نہیں ، ہمیں امید ہے کہ پاکستان مسئلہ کشمیر کو آگے لے جاکر چلے گا، خطے میں قیام امن کیلئے مسئلہ کشمیر کا حل ضروری ہے، انہوں نے وزیراعظم پاکستان نوازشریف سے اپیل کی کہ مسئلہ کشمیر کو عالمی سطح پر اجاگر کر یں۔انکا کہنا تھا کہ مودی سرکار ہوش کے ناخن لے ، بھارت مقبوضہ کشمیر میں مظالم بند کر دے، اقوام متحدہ اپنے مبصریں کشمیر بھیجے ، اس وقت کشمیر میں حالات بہت خراب ہیں۔