اسلام آباد(خصوصی رپورٹ) پاکستان اور افغانستان کے درمیان اگرچہ ان دنوں تعلقات کشیدہ ہیں لیکن پاکستانی فوج کی انسان دوستی اور برادر اسلامی ملک سے ہمدردی میں کوئی کمی واقع نہیں ہوئی۔ تفصیل کے مطابق بارڈر پر موجود پاک فوج کو گزشتہ روز ایمرجنسی میں ایک پیغام موصول ہوا کہ افغان آرمی کا ایک فوجی اپنڈکس کی شدید تکلیف میں مبتلا ہے تو پاکستانی فوج نے طورخم بارڈر گیٹ بند ہونے کے باوجود اسے فوری طبی امداد پہنچائی اور اس مقصد کیلئے افغانی فوجی کو پاکستانی حدود میں واقع ہسپتال لائے جہاں بیمار افغانی فوجی کا مکمل طبی معائنہ کیا گیا اور اس کے تمام ٹیسٹ کئے گئے۔ ٹیسٹ رپورٹس کے بعد موقع پر موجود سرجن نے افغان فوجی کو مزید کچھ وقت اپنی نگرانی میں رکھنے کا فیصلہ کیاہے۔
پاک فوج کے بارڈر پر موجود کمانڈر ترجمان نے میڈیا سے گفتگو کرتے ہوئے کہا کہ ہمیں اس بات کی خوشی ہے کہ ہم انسانیت کے کام آئے ہیں اور برادر اسلامی ملک کیلئے اس کام سے خیر سگالی کے جذبے کو مزید تقویت ملے گی۔