لاہور (این این آئی ) ریٹرننگ آفیسر نے وزیر اعظم نواز شریف کے حلقہ این اے 120سے جمع کروائے گئے کاغذات نامزدگی کی مصدقہ نقول تحریک انصاف کو فراہم کرنے کا حکم دیدیا ۔تحریک انصاف کی رہنما ڈاکٹر یا سمین راشد کی وکیل آسیہ ناز کا کہنا تھا کہ کسی بھی سیاسی جماعت کے سربراہ کو جب کوئی عوامی عہدہ مل جا تا ہے تو اس کے کا غذات نامزدگی پبلک پراپرٹی ہو تے ہیں لیکن ان کاغذات تک عوام کی رسائی ہی نہیں ہے ،ہم پہلے الیکشن کمیشن آف پاکستان گئے تو انہوں نے کہا کہ اپنے متعلقہ ریٹرننگ آفیسر کے پاس جائیں جس کے بعدہم ایڈیشنل سیشن جج ریٹرننگ آفیسر مبشرندیم کے پاس آئے انہو ں نے بیانات کیلئے طلب کیا تھا ۔ریٹرنگ آفیسر نے کا غذات نامزدگی ہمیں فراہم کرنے کے احکامات جا ری کر دئیے ہیں ۔اس موقع پر پی ٹی آئی کی رہنما یاسمین راشد کا کہنا تھا کہ پا نامہ لیکس میں وزیر اعظم نواز شریف کے بچوں کا نام بھی آیا ہے ،وزیر اعظم اور ان کے بچے اپنے اثاثوں کے بارے میں مسلسل غلط بیانی کر رہے ہیں ۔ اسی لیے میں نے وزیراعظم کے حلقہ این اے 120سے جمع کروائے گئے کا غذات نامزدگی کی مصدقہ نقول مانگی ہیں، ، وزیر اعظم کے صاحبزادوں کے اثاثوں کے بارے میں معلومات حاصل کرنا چا ہتی ہو ں تاکہ ہم ان تمام کا غذات کا مطالعہ کریں اور کیس آگے چل سکے ۔کا غذات نامزدگی سے تمام حقائق سامنے آجائیں گے ۔