اسلام آباد (مانیٹرنگ ڈیسک) وزارت داخلہ نے ایم کیو ایم کے رہنما ڈاکٹر عمران فاروق قتل کیس کی پیروی کے لئے وکلاء کا پینل تشکیل دے دیا۔ وزارت قانون کی منظوری کے بعد دو وکلا مقدمے کی پیروی کرینگے۔ ایف آئی اے کے انسداد دہشت گردی ونگ کی درخواست پر وزارت داخلہ نے ڈاکٹر عمران فارو ق قتل کیس کی پیروی کے لئے وکلاء کا پینل تیار کیا ۔وزارت داخلہ کی طرف سے چار وکلا کے نام وزارت قانون کو بھجوائے گئے ہیں ۔ وزارت قانون کی منظوری کے بعد دو وکلا مقدمے کی پیروی کے لئے منتخب کئے جائیں گے۔ عمران فاروق قتل کیس کی سماعت اسلام آباد کی انسداد دہشت گردی کی خصوصی عدالت میں جاری ہے۔سیکیورٹی خدشات کے باعث گرفتار ملزمان معظم علی، محسن علی اور خالد شمیم کا جیل میں ٹرائل ہو رہا ہے۔سرکاری وکیل نہ ہونے کے باعث ایف آئی اے کے تفتیشی افسروں کو مقدمے کی سماعت کے دوران ہر بار سبکی کا سامنا کرنا پڑا۔۔دوسری طرف قتل کیس کی تفتیش کرنے والی جے آئی ٹی کے ارکان کو دورہ برطانیہ کے لئے تاحال وزارت داخلہ نے اجازت نہیں دی۔جے آئی ٹی کیس سے متعلق بنیادی شواہد اکٹھے کرنے اور برطانیہ میں موجود ایم کیو ایم کے قائد سمیت محمد انوراورافتخار حسین کا بیان ریکارڈ کرنا چاہتی ہے۔