اسلام آباد(مانیٹرنگ ڈیسک) وفاقی وزیر خواجہ آصف نے شیریں مزاری کو قومی اسمبل اجلاس میں ’’ٹریکٹر ٹرالی‘‘ کہنے پر سپیکر قومی اسمبلی ایاز صادق سے معافی مانگ لی۔ وفاقی وزیر دفاع خواجہ آصف نے سپیکر قومی اسمبلی کو خط لکھا جسے سپیکر قومی اسمبلی ایاز صادق نے ایوان میں خود پڑھ کر سنایا‘ خط کے مطابق خواجہ آصف نے کہا کہ میں نے جان بوجھ کر شیریں مزاری کو ٹریکٹر ٹرالی نہیں کہا ‘ ایساشیریں مزاری کے مجھے بار بار پریشان کرنے پر ہوا، خواجہ آصف نے کہا کہ وہ قومی اسمبلی کے اجلاس میں غیر پارلیمانی الفاظ استعمال کرنے پر نادم ہیں۔
خواجہ آصف کے معافی نامہ پر سپیکر ایاز صادق کا کہنا تھا کہ خواجہ آصف ایوان میں خود بھی وضاحت کریں گے ‘ دوسری جانب پاکستان تحریک انصاف کے مرکزی رہنما شاہ محمود قریشی نے کہا کہ ان کی جماعت کی خواتین خواجہ آصف کی معافی پر مطمئن نہیں، شیریں مزاری نے خواجہ آصف کے معافی نامہ پر کہا کہ وہ اس معافی کو مسترد کرتی ہیں ، خواجہ آصف کو معافی سپیکر قومی اسمبلی کی بجائے مجھ سے مانگنی چاہئے تھی۔ شاہ محمود قریشی ، شیریں مزاری و نوید قمر سمیت اپوزیشن کے دیگر اراکین نے بھی اس معافی کو مسترد کیا ہے۔