مظفرآباد (این این آئی) شیر کا ایک اور ڈرون اٹیک، لوئر بورہ اور دھنی مائی صاحبہ کے سینکڑوں افراد ن لیگ میں شامل ، شیر کی دھاڑ جاری، لوئر بورہ اور دھنی مائی صاحبہ سے پیپلزپارٹی کے سرکردہ افراد نے ن لیگ میں شمولیت کا اعلان کر دیا ۔ کارنر میٹنگ سے خطاب کرتے ہوئے سابق کونسلر اور مسلم لیگ ن کے سینئر رہنما سردار صادق عباسی نے کہا ہے کہ فریال تالپور کے درباریوں اور اقتدار پرستوں کو گھر کی راہ دکھائیں گے ، کشمیر کونسل میں دھاندلی کروا کر کے جیتنے والوں کو عوام ووٹ کی پرچی سے عبرتناک شکست دینگے، کسی کو عوامی حقوق پر شب خون مارنے کی اجازت نہیں دی جا سکتی ، حلقہ تین کی آسامیوں کو دوسرے اضلاع منتقل کرنے اور ترقیاتی اسکیموں کی بندر بانٹ اور گھپلوں کی تحقیقات ناگزیر ہو چکیں ہیں، حلقہ تین کے پڑھے لکھے نوجوان دربدر کی ٹھوکریں کھانے پر مجبور ہیں، کشمیر کونسل میں بدترین ہارس ٹریڈنگ کی گئی ہے جس کی پرزور الفاظ میں مذمت کرتے ہیں، حلقہ تین کو لاوارث چھوڑنے والوں کا مظفرآباد میں داخلہ بند کرینگے ، انھوں نے کہا کہ مسلم لیگ کے نامزد امیدوار حلقہ تین بیرسٹر افتخار گیلانی کامیاب ہو کر آئندہ وزیر ہونگے، مظفرآباد اس بار اپوزیشن میں نہیں حکومت میں ہو گی ۔ انہوں نے مزید کہا کہ حکومتی وزراء اور بیوروکریسی میں چند موجود کالی بھیڑوں نے مک مکا کر کے بوگس اور جعلی تقرریاں عمل میں لائی ہیں ، جس کی آزادانہ تحقیقات ہونی چاہئے ، ہم چیف سیکرٹری آزادکشمیر سے مطالبہ کرتے ہیں کہ وہ اس کی آزادانہ اور شفاف تحقیقات کروائیں، چوہدری یاسین اور چوہدری لطیف اکبر کے خلاف قانونی کاروائی کر کے ان دونوں کو نا اہل قرار دیا جائے۔ انہوں نے مزید کہا کہ مسلم لیگ ن میں نئے شامل ہونیوالوں کو مبارکباد اور خوش آمدید کہتے ہیں۔ اس موقع پر اشفاق احمد، عتیق عباسی، محمود عباسی، نوید عباسی، اقبال عباسی، صدیق عباسی ودیگر سینکڑوں کی تعداد میں اپنے کنبوں سمیت مسلم لیگ ن میں شامل ہو گئے ۔ اس موقع پر نئے شامل ہونیوالوں کے اعزاز میں پر تکلف عشائیہ دیا گیا اور نئے شامل ہونیوالوں کو ہار بھی پہنائے گئے ۔