لاہور (این این آئی ) لاہور ہائیکورٹ نے وزیر اعظم محمد نواز شریف کے بیرون ملک دوروں کی نئی تفصیلات اور ان پر آنے والے اخراجات کی رپورٹ طلب کر لی۔گزشتہ روز لاہور ہائیکورٹ کے جسٹس سید منصور علی شاہ نے کیس کی سماعت کی ۔ درخواست گزار بیرسٹر جاوید اقبال جعفری کی جانب سے موقف اختیار کیا گیا کہ وزیر اعظم نواز شریف اپنے اہل خانہ، دوستوں اور عزیز واقارب کے ہمراہ بیرون ملک کے دورے کر رہے ہیں اور ان دوروں پر سرکاری خزانے سے عوام کا پیسا لگایا جا رہا ہے، وزیر اعظم کے بیرون ملک دوروں سے پاکستان کو نہیں بلکہ ان کے ذاتی کاروبار کو فائدہ ہوتا ہے، نواز شریف بھارت گئے اور نان کلچے کھا کر واپس آگئے، ایسے دوروں سے پاکستان کو کیا فائدہ پہنچے گا۔ لہٰذا معزز عدالت سے استدعا ہے کہ وزیر اعظم کو بیرون دوروں پر پرائیویٹ افراد کی جانے پر پابندی عائد کی جائے اور ان دوروں پر سرکاری خزانے پر پیسہ خرچ کرنے پر بھی پابندی عائد کی جائے۔عدالت نے مختصر دلائل سننے کے بعد وزارت خارجہ اور وزارت خزانہ کو حکم دیا کہ وزیر اعظم نواز شریف کے بیرون ملک دوروں کی نئی تفصیلات اور ان پر آنے والے اخراجات کی رپورٹ 25مئی تک عدالت میں جمع کرائی جائے۔