اسلام آباد (نیو زڈیسک ) حکومت کی نئی آٹو پالیسی کے مطابق 1800سی سی تک کی گاڑیوں کی درآمد پر کسٹمز ڈیوٹی میں دو سال کیلئے10فیصد کمی کی گئی ہے جبکہ مقامی آٹو انڈسٹری کی اجارہ داری ختم اور نئے مارکیٹ پلیئرز کیلئے دروازے کھول دئیے ہیں،آٹو انڈسٹری میں اب نئے سرمایہ کار آئیں گے ،نئے پلانٹس لگیں گے جس سے گاڑیاں سستی اور معیاری ملیں گی ، پانچ سالہ آٹو پالیسی کا باضابطہ اعلان آج (پیر )کو کیا جائے گا ،روزنامہ جنگ کے مطابق نئی پالیسی میں آٹو انڈسٹری میں نئے سرمایہ کاروں کیلئے سرمایہ کاری کی حد کم کردی گئی ہے جبکہ پرزہ جات کی درآمد پر 5سال تک رعایت دینے کا فیصلہ کیا گیا ہے نئی پالیسی کے مطابق 1800سی سی تک کی گاڑیوں کی درآمد پر کسٹمز ڈیوٹی میں دو سال کے لیے 10فیصد کمی کی گئی ہے ، یہ کمی یکم جولائی 2017سے 30جون 2019کیلئے ہوگی ،پالیسی کے تحت پاکستان آٹو موٹیو انسٹی ٹیوٹ کا قیام عمل میں لایا جائے گا۔اقتصادی رابطہ کمیٹی نے اڑھائی سال سے التوا ئ کا شکار نئی آٹو پالیسی کی منظوری جمعہ کو دیدی تھی، پالیسی کی سمری کے مطا بق آٹو انڈسٹری میں پہلے سے موجود مینوفیکچرنگ کمپنیوں اور آٹو پارٹس کے سرمایہ کاروں کو ڈیوٹی اور ٹیکس میں دی جانیوالی مراعات حاصل نہیں ہونگی اور ڈیو ٹی اور ٹیکس میں استثنیٰ اور رعایتوں کو گرین فیلڈسرمایہ کاری تک محدود رکھاگیا ہے ا ور گرین فیلڈ انوسٹمنٹ مراعات صرف ان مینوفیکچرر کے لیے ہونگی جو نئے ہونگے، نئے سرمایہ کاروں کو دونوں مقامی اور غیرملکی آٹو پارٹس درآمد کرنیکی اجازت ہوگی ، لیکن ان پر وہی ڈیوٹی عائد ہوگی جو مقامی سطح پر تیار نہ ہونے والے پرزہ جات پر عائد ہے۔نئی پانچ سالہ آٹو پالیسی کا باضابطہ اعلان آج وفاقی وزیر پانی وبجلی خواجہ آصف کریں گے۔