کراچی(نیوز ڈیسک) رینجرز متحدہ قومی موومنٹ (ایم کیو ایم) کی رابطہ کمیٹی کے ڈپٹی کنو نیئرشاہد پاشا کو گرفتار کرلیا جبکہ ایم کیو ایم کے ترجمان نے گرفتاری کی تصدیق کردی۔تفصیلات کے مطابق رینجرز اہلکاروں نے پیر کے روز علی الصبح کارروائی کرتے ہوئے رابطہ کمیٹی کے ڈپٹی کنوینر شاہد پاشا کو گرفتار کیا۔ایم کیو ایم ترجمان واسع جلیل نے شاہد پاشا کی گرفتاری کی تصدیق کرتے ہوئے کہا کہ انہیں رینجرز اہلکاروں نے گلستان جوہر میں واقع اْن کے گھر سے حراست میں لیا۔ایم کیو ایم کی قیادت اور رہنماؤں کی جانب سے شاہد پاشا کی گرفتاری کی شدید مذمت کی گئی ہے۔دوسری جانب رینجرز کی جانب سے ایم کیو ایم رہنما کی گرفتاری کے حوالے سے اب تک کوئی بیان سامنے نہیں آیا۔واضح رہے کہ شاہد پاشا کو تقریباً ایک سال قبل ایم کیو ایم رابطہ کمیٹی کا ڈپٹی کنوینر بنایا گیا تھا، انہیں ایم کیو ایم کے تنظیمی ڈھانچے کا اہم رکن مانا جاتا ہے جنہوں نے پارٹی میں کئی عہدوں پر فرائض انجام دیئے۔قبل ازیں ایم کیو ایم کے سینیئر رہنما ڈاکٹر فاروق ستار نے پریس کانفرنس کے دوران رینجرز پر، ایم کیو ایم سے تعلق رکھنے والے 40 کارکنان کو کراچی سینٹرل جیل میں دوران حراست تشدد کا نشانہ بنانے اور اْن پر پارٹی چھوڑنے کے لیے دباؤ ڈالنے کا الزام لگایا۔ان کا کہنا تھا کہ کارکنان کو دوران حراست تمام سہولیات مہیا کرنے اور ان کے خلاف کیسز واپس لے کر انہیں رہا کرنے کا لالچ دے کر اْن کی وفاداریاں بدلنے کی کوشش کی جارہی ہے۔