اسلام آباد(نیوزڈیسک)پاکستان اورافغانستان نے خطے میں پائیدارامن،استحکام اورانسداددہشت گردی کے لیے مشترکہ کوششوں پراتفاق کرتے ہوئے ایک دوسرے پر اعتماد کرنے اوربرادرممالک کے درمیان بداعتمادی پیداکرنے والے عناصرکی حوصلہ شکنی کی ضرورت پر زوردیاہے،دونوں ممالک نے دوطرفہ تعاون کے فروغ ،تمام مسائل کوحل کرنے اورخطے کو درپیش سیکورٹی چیلنجز کا مقابلہ کرنے کے لیے سٹریٹیجک شعبے میں اتفاق رائے پیداکرنے پررضامندی کا اظہارکیاہے جبکہ پاکستان نے افغان عوام کے ساتھ یکجہتی کا اظہارکرتے ہوئے ان کے ساتھ کھڑا ہونے اور ملک میں امن اوراستحکام کی کوششوں میں ہرممکن مددکرنے کا واضح پیغام دیاہے،وزیراعظم کے مشیر خارجہ وقومی سلامتی سرتاج عزیز سے افغانستان کے اعلی سطح کے وفد نے وزیرخارجہ صلاح الدین ربانی کی قیادت میںملاقات کی، وفد میںقائم مقام وزیردفاع معصوم ستنکزئی، افغان نیشنل ڈائریکٹوریٹ آف سیکورٹی کے ڈائریکٹرجنرل رحمت اللہ نبیل اوردیگرافغان عہدیدارشامل تھے،ملاقات کے دوران فریقین نے دیگر امور کے علاوہ پاک افغان دوطرفہ تعلقات، افغانستان میں ابھرتی سیاسی وسیکورٹی صورتحال دونوں ممالک کے درمیان سیکورٹی کے شعبے میں تعاون اورامن ومفاہمت کے امور پر آزادانہ ماحول میں تبادلہ خیال کیا،مشیرخارجہ نے پاکستان کی طرف سے افغانستان کے ساتھ تعمیری اورمستقبل شناسی کی بنیاد پرتعلقات قائم کرنے کے عزم کا اظہارکرتے ہوئے کہاکہ پاکستان تمام چیلنجز سے نمٹنے کے لیے افغانستان کے ساتھ ملکرکام کرنے کے لیے تیار ہے،انہوں نے زور دیا کہ دونوں ممالک کو ایک دوسرے پراعتماد کرنا چاہیے اورایسے عناصرکی حوصلہ شکنی کرنی چاہیے جو دونوں ممالک کی توجہ اصل معاملات سے ہٹاکر دوستانہ تعلقات کو خراب کرنے اوردونوں برادارممالک کے درمیان بداعتمادی پیداکرنے کی کوششوں میں مصروف ہیں،سرتاج عزیزنے افغانستان میں دہشت گردی کے حالیہ واقعات کی مذمت کے پاکستانی موقف کا اعادہ کرتے ہوئے سوگوارخاندانوں سے تعزیت کا اظہارکیا ،انہوں نے مشترکہ چیلنجزسے نمٹنے اوردہشت گردی کی لعنت کو جڑ سے اکھاڑپھینکنے کی غرض سے مشترکہ کوششوں کی ضرورت پر زور دیا،انہوں نے افغان وفد کو یہ واضح پیغام پہنچایا کہ پاکستان افغانستان کے عوام کے ساتھ یکجہتی کا اظہا ر کرتے ہوئے ان کے ساتھ کھڑا ہے اورافغانستان میں امن اوراستحکام کی کوششوں میں ان کی ہر ممکن مدد کرے گااوراس ضمن میں افغانوں کی قیادت میں امن اورمفاہمت کے عمل میں ہر ممکن سہولت فراہم کرے گا،افغان وزیرخارجہ صلاح الدین ربانی نے مشرکہ مفاد کے تمام شعبوں میں باہمی تعاون بڑھانے کےلئے پاکستان کےساتھ کام کرنے کی خواہش کا اظہارکیا،انہوں نے افغانستان اورخطے میں پائیدارامن،استحکام اورانسداددہشت گردی کےلئے مشترکہ کوششوں کی ضرورت پر زوردیا،فریقین نے دوطرفہ تعاون کے فروغ ،تمام مسائل کوحل کرنے اورخطے کو درپیش سیکورٹی چیلنجز کا مقابلہ کرنے کےلئے سٹرٹیجک شعبے میں اتفاق رائے پیداکرنے پررضامندی کا اظہارکیا۔