کراچی(نیوزڈیسک)پاکستان پیپلزپارٹی کے چیئرمین بلاول بھٹو زرداری نے پیر کو پاسپورٹ آفس صدر میں اپنے پاسپورٹ کی تجدید کے لیے کوائف کا اندراج کرادیا ہے ۔بلاول بھٹو زرداری بلاول ہاو ¿س سے انتہائی سخت سکیورٹی میں پاسپورٹ آفس صدر پہنچے ۔اس موقع پر اطراف کی شاہراہوں پر پولیس کی بھاری نفری تعینات تھی ۔جبکہ پاسپورٹ آفس کے اطراف کی سڑکوں کو عام ٹریفک کے لیے بند کردیا گیا تھا ۔بلاول بھٹو زرداری نے پانچ سے سات منٹ میں اپنے پاسپورٹ کی تجدید کے لیے کوائف کا اندراج کروایا اور تصویریں بنوائیں۔اس موقع پر کوائف کی تجدید کے لیے انہیں وی وی آئی پی سہولیات فراہم کی گئیں ۔کوائف کا اندراج ہوتے ہی وہ سخت سکیورٹی میں بلاول ہاو ¿س روانہ ہوگئے ۔واضح رہے کہ ان کی آمد سے قبل پاسپورٹ آفس کے اطراف میں بلدیہ جنوبی کی طرف سے صفائی کی گئی اور وہاں موجود کچرے کے ڈھیر ہٹادیے گئے ۔ذرائع کا کہنا ہے کہ بلاول بھٹو زرداری کے کوائف کا اندراج ہوگیا اور جلد ہی انہیں نیا پاسپورٹ جاری کردیا جائے گا ۔بلاول زرداری کی آمد کی وجہ سے پاسپورٹ آفس کے اطراف کی سڑکوں کو عام ٹریفک کے لئے بند کرنے کی وجہ سے عام شہریوں کو شدید مشکلات کاسامنا کرنا پڑا جبکہ دوردراز سے پاسپورٹ بنوانے کے لئے آئے ہوئے لوگوں کو بھی آگے جانے سے روک دیاگیا اور جب تک بلاول زرداری کی واپسی نہ ہوئی ان کو آگے نہ جانے دیاگیا۔عوام نے اس طرز عمل پر شدید غم و غصے کا اظہار کیا ہے۔