اسلام آباد(نیوز ڈیسک)راولپنڈی اسلام آباد میں گزشتہ چار گھنٹے سے بارش کا سلسلہ جاری ہے ، مسلسل بارش کے باعث راولپنڈی کے نشیبی علاقوں میں پانی داخل ہو گیا ۔ گلیاں اور سڑکیں ندی نالوں کا منظر پیش کرنے لگیں ۔ راولپنڈی اسلام آباد میں صبح پانچ سے بجے سے بارش کا سلسلہ جاری ہے ، مسلسل تیز بارش کے باعث راولپنڈی میں نالہ لئی کے قریب واقع ڈھوک حسو ، فوجی کالونی اور ڈھوک مٹکیال سمیت دیگر بعض علاقے زیر آب آ گئے ، بارش کا پانی لوگوں کے گھروں میں داخل ہو گیا جس کے بعد لوگ اپنی مدد آپ کے تحت پانی نکالتے رہے ۔ فلڈ کنٹرول روم کے اعداد و شمار کے مطابق اسلام آباد میں گولڑہ میں 77 ، بوکڑہ 71 جبکہ سید پور میں 23 ملی میٹر بارش ریکارڈ ہوئی ، راولپنڈی کے علاقے چکلالہ میں 59 ، میڈیکل کالج کے مقام پر 37 ملی میٹر بارش ریکارڈ کی گئی ۔ فلڈ کنٹرول روم کے مطابق کٹاریاں کے مقام پر نالہ لئی کی سطح 13.75 جبکہ گوالمنڈی کے مقام پر 15.45 فٹ ہے ۔ بارش کی شدت کم ہونے سے نالہ لئی میں پانی کی سطح میں بھی کمی آ رہی ہے تاہم نالہ لئی کے اطراف نشیبی علاقوں میں رہنے والوں کو محتاط رہنے کی ہدایت کی گئی ہے ۔ محکمہ موسمیات نے آج اور اتوار کے دوران اسلام آباد ، پنجاب ، کشمیر ، خیبر پختونخوا میں اکثر مقامات پر جبکہ بلوچستان کے علاقوں سبی ، ژوب ، قلاب ، نصیرآباد ڈویژن ، بالائی سندھ میں کہیں کہیں گرج چمک کے ساتھ بارش کا امکان ہے ۔ گزشتہ روز سب سے زیادہ درجہ حرارت موہنجوداڑو ، روہڑی اور سبی میں 45 ڈگری سینٹی گریڈ جبکہ دالبندین ، شہید بینظیر آباد 44 ، لاڑکانہ ، سکھر ، دادو ، نوکنڈی 43 ، تربت اور رحیم یار خان میں 42 ڈگری سینٹی گریڈ ریکارڈ کیا گیا ۔