لاہور(نیوزڈیسک)خیبر پختونخوا ہ میں حال ہی میں منعقد ہونے والے بلدیاتی انتخابات کے دوران وسیع پیمانے پر بدانتظامی کے واقعات سامنے آنے کے بعد الیکشن کمیشن نے پنجاب اور سندھ میں بلدیاتی انتخابات کے مرحلہ وار انعقاد کی تجویز پر غور شروع کر دیا ۔میڈیا رپورٹ میںباخبر ذرائع کے حوالے سے بتایاگیا ہے کہ الیکشن کمیشن کے سیکرٹری بابر یعقوب فتح محمد اورپنجاب اورسندھ میںکے بلدیاتی سیکرٹریوں کے درمیان ملاقات میں بلدیاتی انتخابات کے انعقاد کے حوالے سے معاملات پر تبادلہ خیال کیا گیا ہے جبکہ اس موقع پردونوں صوبوں کے الیکشن کمشنر زبھی موجود تھے۔الیکشن کمیشن کے ایک عہدے دار نے بتایا کہ ملاقات میںدونوں صوبوں میںآنے والے بلدیاتی انتخابات کے د وران تشدد اور بدانتظامی کو روکنے کے طریق کار پر غور کیا گیاجسکے بعد یہ فیصلہ کیا گیا کہ الیکشن کمیشن کو یہ انتخابات تین مراحل میں انعقاد کروانے کی تجویز پیش کی جائے گی۔اگر یہ تجویز منظور کرلی گئی تو پھر سپریم کورٹ سے اس فیصلے پر نظرثانی کے لیے رجوع کیا جائے گا۔الیکشن کمیشن نے اس سے پہلے دونوں صوبوں میں انتخابات کے مرحلہ وار انعقاد کا منصوبہ تیار کیا تھا لیکن سپریم کورٹ کی جانب سے اس کو مسترد کردیا گیا اور الیکشن کمیشن کو ہدایت کی گئی کہ یہ انتخابات ایک ہی دن 20 ستمبر کو منعقد کیے جائیں۔انہوں نے کہا کہ سندھ اور پنجاب میں 28 جولائی کو حدبندیوں کا کام مکمل ہوجائے گا جس کے بعد بلدیاتی انتخابات کے شیڈول کا اعلان کیا جائے گا۔سندھ میں تقریباً12 کروڑ بیلٹ پیپرز جبکہ پنجاب میں 30کروڑ سے زائد بیلٹ پیپرز کی چھپائی درکار ہوگی اور سرکاری پرنٹنگ پریس مقررہ مدت میں یہ بیلٹ پیپرز کی چھپائی کی صلاحیت نہیں رکھتے۔