اسلام آباد (نیوزڈیسک )پاکستان نے کہا ہے کہ یمن کے مسئلے پر مسلم ممالک سے رابطے میں ہیں۔آئندہ دنوں میں مسئلے پر اسلامی تعاون تنظیم کا اجلاس ہوگا ۔ کابینہ میں تبدیلی سعودی عرب کا داخلہ معاملہ ہے ۔ پاکستان کے چین کے ساتھ حال ہی میں طے پانے والے معاہدوں سے خطے کا منظرتبدیل ہو جائے گا ۔ مشکل کی گھڑی میں نیپالی عوام اور حکومت کے ساتھ ہیں۔مقبوضہ کشمیر میں نئی ہندو بستیاں قائم کر نے بھارتی عزیم پر تشویش ہے۔ روم میں دہشت گردی کے شبہ میں گرفتار پاکستانیوں کے بارے میں اٹلی کے حکام سے رابطے میں ہیں۔ اسلام آباد میں ہفتہ وار نیوز بریفنگ میں دفتر خارجہ کی ترجمان تسنیم اسلم نے کہاکہ پاکستان یمن کے مسئلے پر مسلمان ملکوں سے رابطے میں ہے۔ انہوں نے کہا کہ توقع ہے کہ آئندہ دنوں میں اس مسئلے پر اسلامی تعاون تنظیم کا اجلاس منعقد ہوگاجب ان سے سعودی عرب کی کابینہ میں تبدیلیوں پر تبصرہ کرنے کو کہا گیا تو ترجمان نے کہا کہ یہ سعودی عرب کا داخلی معاملہ ہے اور پاکستان دوسرے ملکوں کے داخلی معاملات میں مداخلت نہیں کرتا۔ ایک سوال پر ترجمان نے کہا کہ پاکستان اور افغانستان دونوں سرحدی انتظام بہتر بنانے کیلئے کوششیں کر رہے ہیں۔ ایک اور سوال پر انہوں نے کہا کہ پاکستان کے چین کے ساتھ حال ہی میں طے پانے والے معاہدوں سے خطے کا منظرتبدیل ہو جائے گا۔ہم صرف اسی صورت میں ان منصوبوں سے بھرپور فائدہ اٹھا سکتے ہیں جب ہمارا ہمسایہ خاص طور پر افغانستان پرامن ہو۔ ایک سوال پر ترجمان نے ماحولیاتی تبدیلی کے مسئلے سے نمٹنے کیلئے سارک تنظیم کے رکن ملکوں کے درمیان زیادہ سے زیادہ تعاون کی ضرورت پر زور دیا۔نیپال میں زلزلے سے متعلق انہوں نے کہا کہ پاکستان ان چند ممالک میں شامل ہے جنہوں نے سب سے پہلے نیپال میں زلزلے سے متاثرہ افراد کیلئے امدادی سامان بھیجا۔ ہماری امدادی ٹیمیں مشکل کی اس گھڑی میں نیپالی عوام کی مدد کیلئے دن رات کام کر رہی ہیں۔تسنیم اسلم نے مقبوضہ کشمیر میں نئی ہندوبستیاں قائم کرنے کے بھارتی عزائم پر تشویش کا اظہار کیا۔ کوئی شماریاتی تبدیلی کشمیریوں کی رائے تبدیل نہیں کر سکتی، کشمیر کا مسئلہ حق رائے دہی سے ہی حل ہو گا۔انہوں نے کہا کہ پاکستان کے ہائی کمیشن نے نئی دلی میں بھارتی حکام سے رابطہ کیا تاکہ بھارتی سمندری حدود میں کشتی کے واقعے میں بچ جانے والے پاکستانی ملاحوں کی حفاظت اور جلد واپسی یقینی بنائی جا سکے انہوںنے بھارت میں اپنے بحری عملے کے ساتھ ناروا سلوک پر تشویش کا اظہار کرتے ہوئے اسے عالمی قوانین اور اقدار کی خلاف ورزی قرار دیا ہے۔بحیرہ عرب میں حادثے کا شکار ہونے والے ایک جہاز کے پاکستانی اور یمنی عملے کو بچا کر بھارت کی ریاست گجرات لے جایا گیا جہاں پاکستانی شہریوں کو پولیس اسٹیشن میں رکھا گیا جب کہ یمنی شہریوں کو ہوٹل میں ٹھہرایا گیا۔تسنیم اسلم نے کہا کہ دو ہفتے قبل مبینہ طور پر منشیات سے بھری ایک پاکستانی کشتی کو پکڑے جانے کے حوالے سے انڈیا نے تاحال پاکستان کو کسی قسم کی معلومات فراہم نہیں کیں۔ایک سوال کے جواب میں ترجمان نے کہاکہ روم میں دہشت گردی کے شبہ میں گرفتار پاکستانیوں کے بارے میں اٹلی کے حکام سے رابطے میں ہیں اور ا ±ن پر لگائے گئے الزامات کی معلومات کا بدستور انتظار ہے۔ایک اور سوال پر تسنیم اسلم نے کہاکہ نیپال کے زلزلہ متاثرین کیلئے پاکستان کی جانب سے بھیجی جانے والی خوراک پر بھارتی میڈیا کی تنقید افسوسناک ہے