اسلام آباد (نیوز ڈیسک) پاکستان پیپلزپارٹی کے رہنما سینیٹر رحمان ملک نے کہا ہے کہ پاکستان پیپلزپارٹی 2013 کے انتخابات میں ہونے والی دھاندلیوں کے خلاف جو ثبوت ہیں وہ جودیشل کمیشن کو پیش کرے گی۔ اور امید ہے کہ جوڈیشل کمیشن کی طرف سے اچھا فیصلہ آئے گا۔ جمعہ کے روز پارلیمنٹ ہاﺅس کے باہر میڈیا سے گفتگو کرتے ہوئے انہوں نے کہا کہ عمران خان نے جن لوگوں پر الزامات لگائے ہیں وہ جودیشل کمیشن میں پیش ہونگے۔ انہوں نے کہا کہ مولانا فضل الرحمٰن کے پاس ایک اچھا موقع ہے کہ وہ جوڈیشل کمیشن میں پیش ہوں۔ انہوں نے کہا کہ آصف علی زرداری نے اسلامی ممالک کے دورے کے لئے ایک وفد تشکیل دیا ہے جس کی میں قیادت کروں گا اور اس وفد میں ایاز سومرو اور یوسف بدہانی شامل ہیں۔ انہوں نے کہا کہ ہمارا وفد بیرون ممالک دورہ کرنے سے پہلے حکومت سے مشاورت کرے گا لیکن یہ وفد پاکستان پیپلزپارٹی کی طرف سے جائے گا۔ ایک سوال کا جواب دیتے ہوئے انہوں نے کہا کہ 1973 کا آئین ذوالفقار علی بھٹو نے پارلیمنٹ میں متفقہ طور پر پاس کروایا تھا جو ایک تاریخ ساز کارنامہ ہے۔