اسلام آباد(نیوز ڈیسک) وزیراعظم نوازشریف کا کہنا ہے کہ اگر سعودی عرب کی سلامتی کو کوئی خطرہ لاحق ہوا تو پاکستان اس کا بھرپور جواب دے گا۔ ذرائع کے مطابق وزیراعظم نوازشریف کی زیرصدارت اعلیٰ سطح کا اجلاس ہوا جس میں وزیر دفاع خواجہ آصف، مشیر خارجہ سرتاج عزیز، آرمی چیف جنرل راحیل شریف اور چیف آف ایئراسٹاف نے شرکت کی، اجلاس میں مشرق وسطیٰ میں ہونے والی حالیہ تبدیلیوں کے تناظر میں اہم امور کا جائزہ لیا گیا جب کہ اس موقع پروزیردفاع خواجہ آصف اور وزیراعظم کے مشیر سرتاج عزیز کو27 مارچ کو سعودی عرب بھیجنے کا فیصلہ کیا گیا، پاکستانی وفد میں مسلح افواج کے سینئر حکام بھی شامل ہوں گے جب کہ وفد دورے کے دوران خطے کی صورتحال کا جائزہ لے گا۔ اجلاس کے موقع پر وزیراعظم نوازشریف کا کہنا تھا کہ سعودی عرب اور دیگر خلیجی ممالک کے ساتھ ہمارے انتہائی قریبی تعلقات ہیں جو انتہائی اہمیت کے حامل ہیں جب کہ اگر سعودی عرب کی علاقائی سا لمیت کو کوئی خطرہ لاحق ہوا تو پاکستان بھی اس کا سخت رد عمل دے گا۔ اس سے قبل ذرائع کا کہنا ہیکہ سعودی وزیر خارجہ شہزادہ فیصل نے گزشتہ رات وزیراعظم نوازشریف کو فون کیا جس میں دونوں رہنماؤں کے درمیان یمن کی صورتحال پر تبادلہ خیال کیا گیا جب کہ اس موقع پرسعودی وزیر خارجہ نے وزیراعظم سے یمن کی صورتحال پر مدد کی بھی درخواست کی۔ واضح رہے کہ سعودی عرب نے یمن کی کشیدہ صورتحال کے باعث پاکستان سے تعاون بھی مانگا ہے۔