اسلام آباد(مانیٹرنگ ڈیسک)جس طرح مسلمان مردوں کو داڑھی منڈوانے کی اجازت نہیں اسی طرح خواتین کے لیے بھی بھنویں بنواناحرام فعل ہے، دارالعلوم دیوبند کا فتویٰ۔ تفصیلات کے مطابق دارالعلوم دیوبند کے دارالافتا سے جاری ہونیوالے ایک فتوے میں کہا گیا ہے کہ مسلمان خواتین کا بھنویں بنوانا غیر اسلامی فعل ہے۔ یہ فتویٰ دارالعلوم دیوبند کے دارلافتا نے بھارتی شہر سہارن پور کے رہائشی ایک شخص کی جانب سے خواتین کی بھنویں بنوانے اور بال کٹوانے سے متعلق مسئلہ دریافت کرنے کے جواب میں دیا ہے۔ مذکورہ شخص کی جانب سے پوچھا گیا تھا کہ کیا شریعت کی رو سے میری اہلیہ

کے لیے بھنویں بنوانا جائز ہے جس کے جواب میں دارالافتا نے فتویٰ جاری کرتے ہوئے کہا ہے کہ بھنویں بنوانا یا بھنوؤں کے بال اکھاڑنا دونوں ہی غیر اسلامی فعل ہیں اور شریعت کی رو سے حرام ہیں، اگر کوئی مسلمان خاتون یہ کام کرتی ہے تو وہ شریعت کی خلاف ورزی کررہی ہے۔دارالفتاء کے سربراہ مولانا صادق قاسمی نے کہا کہ مسلمان خواتین بیوٹی پارلرز جانے سے بھی گریز کریں کیونکہ انہیں غیر مردوں کے سامنے اپنا بناؤ سنگھار دکھانے کی اجازت نہیں۔ انہوں نے کہا کہ جس طرح مسلمان مردوں کو داڑھی منڈوانے کی اجازت نہیں اسی طرح خواتین کے لیے بھی بھنویں بنوانا ممنوع ہے۔