اسلام آباد (نیوز ڈیسک) ایران کے پاسدارانِ انقلاب نے دعویٰ کیا ہے کہ اس کی ایرو اسپیس فورس نے ایران پر مبینہ حملوں کے جواب میں اردن میں واقع الازرق ایئربیس کو بیلسٹک میزائلوں سے نشانہ بنایا،

جس کے نتیجے میں امریکی فضائیہ کے تین ایف-35 جنگی طیارے تباہ ہو گئے۔ایرانی خبر رساں ادارے کے مطابق پاسدارانِ انقلاب کا کہنا ہے کہ اس کارروائی میں متعدد امریکی فوجی افسران اور اہلکار بھی ہلاک ہوئے۔ تاہم اس دعوے کی آزاد ذرائع سے تاحال تصدیق سامنے نہیں آئی۔پاسدارانِ انقلاب کی جانب سے جاری بیان میں کہا گیا کہ یہ حملہ گزشتہ شب ایران پر ہونے والی کارروائیوں کے جواب میں کیا گیا۔ بیان میں مزید کہا گیا کہ خطے میں امریکی فوجی موجودگی کو ناقابل قبول سمجھتے ہوئے ان کے خلاف کارروائیاں جاری رکھی جائیں گی۔

ایرانی فورسز نے اپنے مؤقف میں کہا کہ جب تک خطے سے آخری امریکی فوجی انخلا نہیں کرتا، ان کی مزاحمت جاری رہے گی۔ دوسری جانب اس دعوے پر امریکی یا اردنی حکام کی جانب سے فوری طور پر کوئی باضابطہ ردِعمل سامنے نہیں آیا۔