اسلام آباد(نیوزڈیسک) چین میں طوفان میساک کے باعث آنے والے شدید سیلاب نے بڑے پیمانے پر تباہی مچا دی ہے۔
مختلف علاقوں میں سیلابی ریلوں کے ساتھ سانپ، مگرمچھ اور دیگر جانور آبادیوں میں داخل ہونے سے شہری شدید خوف کا شکار ہیں۔غیر ملکی میڈیا کے مطابق جنوبی چین کے کئی علاقے مسلسل بارشوں کے بعد زیرِ آب آ گئے ہیں، جہاں سیلاب نے جانی و مالی نقصان کے ساتھ معمولاتِ زندگی بھی بری طرح متاثر کیے ہیں۔ ہینگژو شہر ان علاقوں میں شامل ہے جہاں صورتحال سب سے زیادہ تشویشناک بتائی جا رہی ہے۔رپورٹس کے مطابق سیلابی پانی کے دباؤ سے متعدد جانوروں کے فارمز کی حفاظتی دیواریں گر گئیں، جس کے نتیجے میں تقریباً 900 سانپ فرار ہو گئے۔ ان میں سے کئی زہریلے سانپ رہائشی علاقوں تک پہنچ گئے، جبکہ مگرمچھ بھی سیلابی پانی میں تیرتے ہوئے مختلف مقامات پر دیکھے گئے۔
ذرائع کا کہنا ہے کہ اب تک کئی افراد سانپوں کے ڈسنے کا شکار ہو چکے ہیں، جبکہ ایک خاتون کی ہلاکت کی بھی تصدیق کی گئی ہے۔ سوشل میڈیا پر گردش کرنے والی ویڈیوز میں سیلابی پانی کے ساتھ سانپوں کو گھروں کے اندر داخل ہوتے، جبکہ مگرمچھوں اور بڑی تعداد میں بطخوں کو پانی میں بہتے ہوئے دیکھا جا سکتا ہے۔میڈیا رپورٹس کے مطابق اس قدرتی آفت کے باعث اب تک مختلف حادثات میں 39 افراد جان کی بازی ہار چکے ہیں۔دوسری جانب ایک چڑیا گھر میں سیلابی پانی داخل ہونے کے بعد کئی جانور بھی اپنے باڑوں سے نکل گئے۔ اطلاعات کے مطابق دو زیبرے، ایک کوہان بیل، تین چھوٹے قد کے گھوڑے اور دو گدھے بھی فرار ہو گئے، جن کی تلاش اور محفوظ واپسی کے لیے متعلقہ ادارے کارروائیاں جاری رکھے ہوئے ہیں۔
View this post on Instagram
