اسلام آباد (نیوز ڈیسک) تہران/نئی دہلی: ایران نے بھارتی شہریوں کے لیے ویزا فری انٹری کی سہولت بند کرنے کا اعلان کر دیا ہے۔بھارتی میڈیا کے مطابق ایران نے بھارت کے ساتھ سفری قواعد میں بڑی تبدیلی کی ہے اور اب بھارتی شہریوں کو ون وے ویزا فری انٹری نہیں دی جائے گی۔رپورٹس کے مطابق ایران کی یہ پابندی ایسے متعدد واقعات کے بعد نافذ کی گئی ہے جن میں بھارتی شہری ملازمت کے جھوٹے وعدوں یا دوسرے ممالک جانے کے بہانے ایران بلائے گئے، اور وہاں پہنچنے پر کئی افراد کو اغوا کر کے تاوان کا مطالبہ کیا گیا۔
بھارتی وزارت خارجہ نے ایک بیان میں کہا ہے کہ ایرانی حکومت نے یہ فیصلہ عام بھارتی پاسپورٹ رکھنے والے مسافروں کے لیے ویزا چھوٹ کی سہولت 22 نومبر سے معطل کرنے کے بعد کیا ہے۔ وزارت کا کہنا ہے کہ یہ اقدام جرائم پیشہ عناصر کے ممکنہ غلط استعمال کو روکنے کے لیے کیا گیا۔اب 22 نومبر سے بھارت کے عام پاسپورٹ رکھنے والے افراد کو ایران میں داخلے یا وہاں سے کسی تیسرے ملک تک سفر کے لیے پہلے سے ویزہ حاصل کرنا ہوگا۔
