اسلام آباد (نیوز ڈیسک)  امریکی وزیر دفاع پیٹ ہیگستھ کے دائیں بازو پر بنے ایک ٹیٹو نے تنازع کھڑا کر دیا ہے، جس پر عربی زبان میں “كافر” لکھا ہوا ہے۔

حال ہی میں پیٹ ہیگستھ نے امریکی ریاست ہوائی میں واقع جوائنٹ بیس پرل ہاربر-ہکَم کا دورہ کیا۔ اس دورے کے بعد انہوں نے اپنے ایکس (سابقہ ٹوئٹر) اکاؤنٹ پر ایک تصویر شیئر کی، جس میں ان کے دائیں بازو پر یہ متنازعہ ٹیٹو نمایاں طور پر نظر آ رہا تھا۔ تصویر سامنے آتے ہی سوشل میڈیا پر بحث چھڑ گئی اور انہیں اسلاموفوبیا کو فروغ دینے کے الزامات کا سامنا کرنا پڑا۔

امریکا میں مسلم کمیونٹی کے حقوق کے لیے سرگرم تنظیم “کونسل آن امریکن-اسلامک ریلیشنز” (CAIR) نے بھی اس معاملے پر اپنا ردعمل ظاہر کیا۔ تنظیم کے مطابق “كافر” کا مطلب ایسا شخص ہوتا ہے جو جان بوجھ کر الٰہی سچائیوں کو جھٹلاتا یا ان کا انکار کرتا ہے۔ کونسل نے اس ٹیٹو کو مسلم دشمنی کی علامت قرار دیا اور کہا کہ یہ اسلام کے خلاف متعصبانہ سوچ کو ظاہر کرتا ہے۔

سوشل میڈیا پر بھی صارفین نے سخت ردعمل دیا ہے۔ ایک فلسطینی صارف، نیردین کسوانی، نے تبصرہ کرتے ہوئے لکھا کہ “ہیگستھ نے اپنے بازو پر ‘كافر’ لکھوایا ہے، جو ایک صلیبی نعرہ ہے۔ یہ صرف ایک ذاتی فیصلہ نہیں بلکہ اسلاموفوبیا کی علامت ہے، خاص طور پر ایسے شخص کے لیے جو امریکی جنگی پالیسیوں کی نگرانی کرتا ہے۔”

یہ تنازعہ زور پکڑ رہا ہے اور سوشل میڈیا پر لوگوں کی جانب سے مختلف آرا سامنے آ رہی ہیں، جبکہ کئی حلقے اس اقدام کو مسلمانوں کے خلاف ایک واضح پیغام قرار دے رہے ہیں۔