تل ابیب (این این آئی)عالمی ریٹنگ ایجنسی اسٹینڈرڈ اینڈ پوورز نے اسرائیل کے طویل مدتی کریڈٹ ریٹنگ اے پلس سے کم کر کے اے کر دی ہے۔عرب ٹی وی کے مطابق غزہ پر جاری مسلسل جارحیت کے بعد لبنان میں نیا جنگی محاذ کھولے جانے پر سیکیورٹی کے بڑھتے خدشات کے پیش نظر عالمی ریٹنگ ایجنسی اسٹینڈرڈ اینڈ پوورز نے اسرائیل کی طویل مدتی کریڈٹ ریٹنگA+ سے کم کر کے Aکر دی ہے۔
ایجنسی نے اسرائیلی معیشت کے لیے فیوچر آٹ لک کو تبدیل کر کے اسے بھی منفی کر دیا ہے اور اس کے ساتھ واضح نوٹ دیا ہے کہ ایران کے ساتھ براہ راست جنگ چھڑنے کا خطرہ ظاہر ہو رہا ہے۔
کریڈٹ ریٹنگ میں کمی اسرائیل کی معیشت اور اس کی مالیات عامہ پر اثرات کی عکاس ہے، یہ لبنان میں حزب اللہ کے ساتھ تنازع کی ابتری کا نتیجہ ہے۔ایجنسی کا کہنا تھا کہ ہمیں اس بات کو مد نظر رکھنا چاہیے کہ غزہ میں فوجی سرگرمی اور اسرائیل کی شمالی سرحد کے پار لڑائی کی شدت میں اضافہ 2025 میں بھی جاری رہ سکتا ہے۔ ہم توقع کر رہے ہیں کہ دفاعی اخراجات میں اضافے کے ساتھ مختصر اور درمیانی مدت میں اسرائیل کا مالی خسارہ زیادہ بڑے پیمانے پر بڑھے گا۔
