واشنگٹن(این این آئی)امریکی مسلم رہنمائوں کی جانب سے بائیکاٹ کے اعلان کے بعد وائٹ ہائوس نے افطار ڈنر منسوخ کردیا۔عرب ٹی وی کے مطابق نام ظاہر نہ کرنے کی شرط پر وائٹ ہائوس ذرائع نے بتایا کہ مسلم رہنمائوں کی جانب سے افطار ڈنر کے بائیکاٹ کے بعد وائٹ ہائوس نے تقریب منسوخ کردی ۔
کونسل آن امریکن اسلامک ریلیشنز کے ڈپٹی ڈائریکٹر ایڈورڈ احمد مچل نے بتایا کہ تقریب اس لیے منسوخ کی گئی کیونکہ لوگوں کی بڑی تعداد نے شرکت نہ کرنے کا فیصلہ کیا تھا، بائیکاٹ کی فہرست میں وہ لوگ بھی شامل تھے جنہوں نے ابتدائی طور پر رضامندی ظاہر کی تھی۔انہوں نے بتایا کہ امریکی مسلم کمیونٹی نے واضح کر دیا تھا کہ ہمارے لیے وائٹ ہائوس کے ساتھ افطار کرنا ناقابل قبول ہو گا جو غزہ میں فلسطینی عوام کو قتل کرنے کے اسرائیلی حکومت کے اقدامات کی حمایت جاری رکھے ہوئے ہیں۔ناقدین نے خبردار کیاکہ مسلم رہنمائوں میں غم و غصہ نومبر میں ہونے والے صدارتی انتخابات میں بائیڈن کے انتخابی امکانات کے لیے ممکنہ طور پر خطرہ بن سکتا ہے۔
