پٹنہ(این این آئی)بھارتی ریاست بہار میں 5سالہ بیٹے کی ماں نے اپنے شوہر کو صرف اس بات پر قتل کردیا کیوں کہ وہ انسٹاگرام پر ویڈیو ریلز اپ لوڈ کرنے پر اعتراض کرتا تھا۔بھارتی میڈیا کے مطابق 25سالہ مہیشور کمار رائے کولکتہ میں مزدوری کرتا تھا اور تعطیلات پر بہار اپنے گھر آیا تھا اور بیوی بچے کے ساتھ سسرال گیا تھا لیکن رات گئے واپس نہیں لوٹا۔مہیشور کے بھائی نے فون کیا تو موبائل پر کوئی اور تھا جس پر وہ اپنے اہل خانہ کو لے کر مہیشور کے سسرال پہنچا تو اپنے بھائی کو مردہ حالت میں پایا جبکہ اس کی بیوی اور سسرال والے گھر سے غائب تھے۔

مہیشور کے گھر والوں نے بتایا کہ سسرال والوں میں سے 4افراد لاش کو ٹھکانے لگانے کے لیے لے جارہے تھے۔ ہمارے پہنچنے پر لاش چھوڑ کر فرار ہوگئے۔پولیس کے مطابق مہیشور کو اپنی بیوی کے وائرل گانوں پر انسٹاگرام ریلز بنانے کے جنون پر اعتراض تھا اور وہ اسے بار بار منع کرتا تھا جس پر دونوں کے درمیان جھگڑا بھی ہوتا تھا۔پولیس نے بتایا کہ مہیشور کی لاش کو پنکھے سے لٹکایا گیا تھا تاکہ اسے خودکشی ظاہر کیا جا سکے۔ لاش کو پوسٹ مارٹم کے لیے اسپتال بھیج دیا گیا اور ملزمان کی تلاش میں چھاپا مار کارروائی جاری ہے۔