ٹوکیو(این این آئی)جاپان کے صوبے اشیکاوا میں گزشتہ روز آنے والے زلزلے کے باعث مختلف حادثات میں اموات کی تعداد 55ہو گئی۔غیرملکی میڈیاکے مطابق جاپان کے وسطی صوبے اشیکاوا میں7.6شدت کے زلزلے کے بعد بڑے پیمانے پر تباہی پھیل گئی،ملبے تلے دبے افراد کو نکالنے کیلئے ریسکیو حکام کی کوششیں جاری ہیں۔اب تک 150سے زائد آفٹر شاکس آ چکے ہیں،ہلاکتوں میں اضافے کا بھی خدشہ ظاہر کیا جا رہا ہے۔جاپانی وزیر اعظم کا کہنا ہے کہ آفت کے متاثرین کو تلاش کرنے،انہیں بچانے کیلیے وقت سے مقابلہ کرنا ہے، ریجن میں 33ہزار گھروں کو بجلی کی فراہمی منقطع ہے۔
اشیکاوا میں سونامی کی تمام وارننگز واپس لے لی گئی ہیں،متاثرہ علاقوں سے 62ہزار افراد کا انخلا کرایا گیا ہے۔گزشتہ روز آئے زلزلے کے باعث اشیکاوا میں تباہی کے آثار جا بجا نظر آ رہے ہیں، متعدد عمارتیں گر گئیں، سڑکوں پر دراڑیں پڑ گئیں۔نوتو ریجن میں عمارتوں میں اب بھی آگ لگی ہوئی ہے، متعدد ہائی ویز لینڈ سلائیڈنگ کی زد میں آئی ہیں۔گزشتہ روز کے زلزلے کی شدت سے 300کلو میٹر دور ٹوکیو میں بھی عمارتیں لرز اٹھی تھیں۔شمالی اور جنوبی کوریا میں بھی زلزلے کے جھٹکے محسوس کیے گئے جس کے بعد روس اور شمالی کوریا نے کچھ ساحلی علاقوں میں سونامی کی وارننگ جاری کی تھی۔
