ریاض(این این آئی)سعودی عرب کے ولی عہد اور نائب وزیراعظم شہزادہ محمد بن سلمان نے سعودی آرامکو کے چار فی صد حصص خودمختار دولت فنڈ(پبلک انویسٹمنٹ فنڈ ،پی آئی ایف)کو منتقل کردئیے۔میڈیارپورٹس کے مطابق ایک بیان میں ولی عہد نے کہا کہ حصص کی منتقلی کے بعد ریاست سعودی آرامکو میں سب سے بڑی شیئرہولڈر بن گئی ہے کیونکہ اس کے
پاس کمپنی کے 94 فی صد سے زیادہ حصص ہوگئے ۔کمپنی کی مارکیٹ سرمایہ کاری کی قدرکی بنیاد پر چارفی صد حصص کی مالیت قریبا 80 ارب ڈالر ہوگی۔ولی عہد نے ایک بیان میں کہا کہ موجودہ حصص کی منتقلی سے پی آئی ایف کے اثاثوں میں اضافے میں مدد ملے گی۔سعودی عرب نے اس فنڈ کے اثاثوں کو 2025 کے آخر تک قریبا( 40 کھرب ریال)ٹریلین ڈالرتک بڑھانے کا ہدف مقرر کیا ۔سعودی آرامکو نے ایک بیان میں کہا کہ حصص کی منتقلی حکومت اورریاست کے ملکیتی خودمختار فنڈ کے درمیان نجی لین دین ہے۔کمپنی اس عمل میں فریق نہیں ہے اور اس نے کوئی معاہدہ نہیں کیا۔اس نے اس منتقلی سے حاصل ہونے والی کوئی آمدن وصول کی ہے اور نہ کوئی رقم ادا کی ۔بیان میں کہا گیا کہ اس اقدام سے حصص کی تعداد یا کمپنی کے آپریشنز، حکمت عملی، منافع کی تقسیم کی پالیسی یا گورننس فریم ورک پرکوئی اثر نہیں پڑے گا۔ سرکاری سرمایہ کاری فنڈ کومنتقل ہونے والے حصص کی قدر دیگر موجودہ عام حصص کے برابر ہے اور وہ یکساں درجہ رکھتے ہیں۔سعودی حکام نے اس سے قبل آرامکو کے حصص کی فروخت کا امکان ظاہرکیا تھا۔پی آئی ایف نے اس معاملے پرکوئی تبصرہ نہیں کیا۔
