مکہ مکرمہ(این این آئی)الحرمین الشریفین کے انتظامی امور کے ذمہ دار ادارے حرمین پریزیڈینسی کی طرف سے جاری ایک رپورٹ میں بتایا گیا ہے کہ کرونا وبا پر قابو پانے کے بعد عمرہ سیزن کی بحالی کے بعد اب تک 40 لاکھ مسلمان مسجد حرام اور بیت اللہ کے دیدار کی سعادت حاصل کرچکے ہیں۔غیرملکی خبررساں ادارے کے مطابق رپورٹ میں بتایا گیا کہ مسجد حرام میں 25 مقامات پر
تھرمو کیمرے نصب ہیں جن میں رواں عمرہ سیزن کے دوران چار ملین زائرین کا درجہ حرارت چیک کیا گیا جس کے بعد انہیں عمرہ اور مسجد حرام میں عبادت کی اجازت دی گئی۔الحرمین الشریفین کے وبائی تحفظ کے امور کے سربراہ حسن السویھری نے بتایا کہ مسجد حرام میں آنے والے زائرین کا درجہ حرارت اور بخار معلوم کرنے کے لیے 100 ملازمین کو پیشہ وارانہ بنیادوں پر کام کی تربیت دی گئی ہے۔ یہ تمام ملازمین مسجد حرام کے داخلی اور خارجی راستوں پر لگے کیمروں کو کنٹرول کرنے کے ساتھ ساتھ تھرمو کیمروں کو بھی استعمال کرکے زائرین کی مدد کرتے ہیں۔مسجد حرام کی انتظامیہ کی طرف سے مسجد میں سینی ٹائزنگ کے لیے 20 بائیو کیر ماڈل سسٹم فراہم کیے گئے ہیں۔ یہ آلات خشک بھاپ کا استعمال کرتا ہے تاکہ زمین پر کسی قسم کے جراثیم کا کوئیی سراغ باقی نہ رہے اور نمازیوں اور عازمین حج کی عبادت اور مناسک کی ادائی میں کوئی رکاوٹ پیدا نہ ہو۔ڈیوائس کی مدد سے ماحول دوست ہائپوکلورائڈ بی سی65کا اسپرے کیا جاتا ہے۔ یہ ایک خوشبو دار اسپرے ہے جسمانی طور پر کسی بھی طرح کا منفی اثر نہیں ڈالتا۔
