لندن (این این آئی)بھاتی حکومت کے متنازع زرعی قوانین کے خلاف ہزاروں افراد نے لندن میں بھارتی ہائی کمیشن کے سامنے احتجاجی مظاہرہ کیا۔بھارت کے دارالحکومت دہلی اور دیگر ریاستوں میں کئی روز سے کسانوں کا زرعی قوانین کے خلاف

احتجاج جاری ہے جبکہ حکومت اور کسانوں کے درمیان مذاکرات کے 5 دور ہوچکے ہیں جو کسی نتیجے کے بغیر ختم ہوئے۔بھارت کو کسانوں کے احتجاج کے باعث دنیا میں شرمندگی کا سامنا کرنا پڑ رہا ہے اور اب کسانوں کی حمایت میں لندن میں احتجاج کیا گیا ہے۔ لندن میں ہزاروں سکھ متنازع زرعی قوانین کے خلاف سراپا احتجاج ہیں اور انہوں نے بھارتی ہائی کمیشن کا گھیراؤ کرلیا۔ایک ہزار سے زائد سکھوں کے بائیک اور کاروں پر لندن پہنچنے پر ٹریفک کا نظام درہم برہم ہوگیا جبکہ احتجاج کے سبب وسطی لندن کا نظام زندگی بھی بری طرح متاثر ہے۔کسانوں کی حمایت میں ریلی سے وسطی لندن کی فضا بھارت کے خلاف نعروں سے گونج اٹھی ہے جبکہ مظاہرین کا کہنا ہے کہ مودی حکومت کسانوں کیمعاشی قتل عام میں ملوث ہے۔بھارت کے خلاف لندن کے علاوہ دیگر شہروں میں بھی مظاہروں کا اہتمام کیا گیا ہے۔ایک نجی ٹی وی چینل کی رپورٹ کے مطابق احتجاجی افراد کی تعداد دس ہزار تک تھی۔