واشنگٹن(مانیٹرنگ ڈیسک) امریکا میں صدارتی انتخاب کی پولنگ کے بعد نتائج کا سلسلہ جاری ہے جس میں ٹرمپ اور جوبائیڈن کے درمیان کانٹے کا مقابلہ ہو رہا ہے،امریکا کی بیشتر ریاستوں میں پولنگ کا وقت ختم ہو گیا جبکہ گنتی کا عمل جاری ہے، غیر حتمی نتائج کے مطابق

آج کے دن جوبائیڈن کو امریکی صدر پر برتری حاصل رہی ہے ۔ سی این این کی رپورٹ کے مطابق ٹرمپ مطلوب 270الیکٹورل ووٹ میں سے ابھی تک 213 ووٹ حاصل کر پائے ہیں جبکہ ان کے مدمقابل امیدوار جوبائیڈن227الیکٹورل ووٹ لے کر ٹرمپ سےچودہ ووٹ آگے ہیں ۔دوسری جانب فوکس نیوز کی تازہ رپورٹ کے مطابق جوبائیڈن صدر بننے کیلئے مطوب 270الیکٹورل ووٹ میں سے 238ووٹ حاصل کر نے میں کامیاب ہوئے تاہم موجودہ امریکی صدر 213الیکٹورل ووٹ کے ساتھ اپنے حریف سے 25ووٹ پیچھے ہیں ۔ تاہم یہ نتائج غیر حتمی اور غیر سرکاری ہیں ۔ دریں اثنا امریکی صدارتی انتخاب میں 50 ریاستوں میں سے 41 کے متوقع نتائج جاری کیے جا چکے ہیں جبکہ باقی نو ریاستوں میں متوقع نتائج کا اعلان ابھی ہونا ہے۔تاہم ماہرین کی پیشگوئی اور رائے شماری کے برعکس صدر ٹرمپ نے انتخاب میں زیادہ بہتر کارکردگی دکھائی ہے۔ ابھی تک کی گنتی کے مطابق جوبائیڈن نے’’ سات کروڑ پانچ ہزار پانچ سو اڑسٹھ‘‘(70005568)ووٹس حال کیے ہیں ، جو ٹوٹل پول کیے جانے والے ووٹس کا 50.2%ہے جبکہ  مقابلے میں ڈونلڈ ٹرمپ نے’’ چھ کروڑ بہتر لاکھ نوے ہزار تین سواٹھاسی‘‘ (67290388)ووٹس حاصل کیے ہیں جو کہ ٹوٹل ووٹوں کا 48.2% ہے ۔ ماہرین ٹرمپ کی کارکردگی پر حیران ہیں کیونکہ امریکی تجزیہ نگاروں کا اندازہ تھا کہ جوبائیڈن واضح مارجن حاصل کریں گے لیکن ڈونلڈ ٹرمپ کی کارکردگی نے سب کو حیران کر دیا ہے ۔