اسلام آباد،ماسکو(مانیٹرنگ ڈیسک،این این آئی )بیلجئم میں آقائے دو جہاں حضرت محمدۖ کا خاکہ کلاس میں دکھانے والا ٹیچر معطل ، میڈیا رپورٹس کے مطابق مذکورہ ٹیچر نے فرانسیسی استاد کے معاملے  پر بات کرتے ہوئے حضرت محمد ۖ کا خاکہ دکھایا تھا جس کے بعد برسلز کے

ضلع مولینبیک میں کام کرنیوالے ٹیچر کومعطل کردیا گیا، ملزم نے ان میں سے ایک خاکہ دکھایا تھا جو اس سے پہلے میگزین چار لی ہیبڈو چھاپ چکا ہے ۔مولینبیک کے میئر کے ترجمان نے بتایاکہ ہمارا فیصلہ ان خاکوں سے متعلق اس حقیقت پر مبنی ہیں کہ یہ قابل اعتراض ہیں، اگر وہ (محمد ۖ )نبی نہ ہوتے تو ہم تب بھی یہی کرتے ۔ترجمان کا مزید کہنا تھاکہ بچوں کی عمریں دس سے گیارہ سال تھیں اور دو سے تین والدین نے شکایت کی ۔دوسری جانب عالمی شہرت یافتہ مکس مارشل آرٹ (ایم ایم اے)فائٹر خبیب نورما گومیدوف نے گستاخانہ خاکے شائع کرنے اور فرانسیسی صدر کی جانب سے اسلام مخالف بیان دینے کی شدید الفاظ میں مذمت کی ہے۔میڈیارپورٹس کے مطابق مکسڈ مارشل آرٹس میں اپنے کیریئرتک ناقابل شکست رہنے والے فاتح خبیب نورما گومیدوف نے فرانس میں گستاخانہ خاکوں کی اشاعت اور فرانسیسی صدر ایمانوئیل میکرون کی جانب سے مسلمان اور اسلام مخالف بیان دینے کی شدید الفاظ میں مذمت کی ہے۔ اور بھرپور

احتجاج کرتے ہوئے فرانسیسی صدر کی تصویر انسٹاگرام پر شیئر کی ہے جس پر جوتے کا نشان بناہوا ہے۔خبیب نے گستاخانہ خاکوں کی اشاعت پر شدید غصے کا اظہار کرتے ہوئے لکھاکہ خداوند کریم اس بری مخلوق اور اس کے تمام پیروکاروں کے چہروں کو بدل دے، جو آزادی اظہار رائے

کے نعرے کے تحت ڈیڑھ ارب سے زائد مسلمانوں کے جذبات مجروح کرتے ہیں۔ اللہ پاک ان کو اس زندگی اور آخرت کی زندگی میں رسوا کرے گا۔ اللہ کے حساب میں جلدی ہے اور آپ دیکھیں گے۔پوسٹ میں مزید لکھا گیا ہم مسلمان اپنے نبی حضرت محمد مصطفی ۖ کو اپنی ماں، اپنے والد، بچوں، بیویوں اور ان تمام لوگوں سے زیادہ محبت کرتے ہیں جو ہمارے دل کے قریب ہیں۔ یقین کریں یہ اشتعال انگیزی ان کے پاس دوبارہ آئے گی۔