دبئی (پی این پی) آن لائن ڈیوٹی دینے والے غیر ملکی پروفیشنلز کے لیے دبئی حکام نے بڑی سہولت کا اعلان کیا ہے، دبئی نے آن لائن ڈیوٹی پروگرام متعارف کرایا ہے۔اس کے تحت آن لائن ڈیوٹی دینے والے غیرملکی پروفیشنلز اور ان کے اہل خانہ کو سال بھر کا اقامہ جاری ہوگا اور یہ قابل توسیع ہوگا۔غیرملکی کارکن اپنی ان کمپنیوں کی جانب سے مطلوبہ کام انجام دیتے رہیں گے جن کے صدر دفاتر دبئی سے باہر واقع ہیں۔سعودی ذرائع ابلاغ کے مطابق دبئی حکام نے آن لائن ڈیوٹی پروگرام کے تحت غیرملکی پروفیشنلز کو اقامہ دینے کے لیے

مندرجہ ذیل شرائط مقرر کی ہیں۔جس کے تحت اقامہ لگواتے وقت پاسپورٹ کم از کم چھ ماہ کے لیے مؤثر ہونا ضروری ہے، دبئی میں کم از کم ایک سال تک کا میڈیکل انشورنس مؤثر ہو اور کمپنی کے ساتھ کم از کم ایک سال تک کی ملازمت کا معاہدہ بھی منسلک ہو۔ اس کے علاوہ آخری تنخواہ کا سرٹیفیکیٹ بھی پیش کرنا ہوگا، کم از کم تنخواہ5 ہزار ڈالر ہونا ضروری ہے، بینک سے آخری تین ماہ کی تنخواہ سلپ بھی پیش کرنا ہوگی اور اقامہ فیس287 ڈالر ادا کرنا ہوگی۔