انقرہ (این این آئی )ترکی نے متحدہ عرب امارات کے اسرائیل کے ساتھ دوستانہ مراسم کے قیام کے اعلان پر کڑی تنقید کی ہے اورکہاہے کہ متحدہ عرب امارات کا اسرائیل سے دوستی معاہدہ فلسطینی قوم کے ساتھ خیانت ہے اور اس خیانت پر تاریخ امارات کو معاف نہیں کرے گی۔غیرملکی خبررساں ادارے کے مطابق ترک وزارت خارجہ کی طرف سے جاری ایک بیان میں کہا گیا کہ ترکی فلسطینی قوم کے ساتھ کھڑا ہے اور امارات کے اسرائیل کے حوالے سے فلسطینی قیادت کی طرف سے اختیار کردہ جرات مندانہموقف کی تائید کرتا ہے۔بیان میں کہا گیا کہ امارات

کا یک طرفہ طور پر اسرائیل کو تسلیم کرنا اور سنہ 2002 میں سعودی عرب کی طرف سے پیش کردہ امن فارمولے سے باہر نکلنا باعث تشویش ہے۔بیان میں کہا گیا کہ متحدہ عرب امارات اپنے خفیہ مقاصد کے حصول اور امریکا کی جانب سے فلسطینیوں کے حقوق کی نفی پرمبنی منصوبے کو آگے بڑھانے کے لیے اسرائیل کے ساتھ کھڑا ہوگیا ہے۔بیان میں کہا گیا کہ ترکی فلسطینی قوم کے حق خود ارادیت کی مکمل حمایت جاری رکھے گا۔